Сыр өңірі әртістерінің кәрі құрлыққа өнер көрсетуге аттанғаны мәлім. Шотландияның Эдинбург қаласында өтіп жатқан «ФРИНДЖ» өнер фестивалінде Қызылорда облыстық қазақ музыкалық драма театрының «Ақбаян» спектакілінің көрсетілімі өтті.

Еске сала кетейік, Қызылорда облыстық Нартай Бекежанов атындағы қазақ музыкалық драма театры сөз зергері Ғабит Мүсіреповтің «Қозы Көрпеш-Баян Сұлу» лиро-эпостық драмасының желісі бойынша сахналанған «Ақбаян» спектаклімен қатысуда.

Шотландияның Эдинбург қаласында 3 тамыз күні басталған өнер фестивалі 27 тамызға дейін жалғасады. Осы кезеңде көрермен назарына 3700 түрлі жанрдағы қойылым ұсынылады.

«Фриндж» («Fringe») фестивалі 1947 жылдан бастап жыл сайын ұйымдастырылады және әлем бойынша театр өнеріндегі ең ірі шара болып табылады. Айта кетейік, биыл айтулы фестивальге әлемнің 50 елінен келген 50 000-ға жуық артист қатысуда.