− Елбасының «Ұлы даланың жеті қыры» атты мақаласының бесінші тармағында ұлттық музыка мен фольклорды әлемдік деңгейде насихаттау және ғылыми-техникалық мүмкіншіліктерді сақтай отырып кейінгі ұрпаққа жеткізу жайында айтылды. Біз ұйымдастырып отырған республикалық дәстүрлі әнші, жыршы фестивалінің мазмұндық маңызы да осыған негізделген. Бұл − дәстүрлі өнердегі белсенді еріктілердің бастамасы, шараға ешқандай мемлекеттік мекеменің немесе қоғамдық қордың ықпалы жоқ. 

− Қаржылық мүмкіндігімізге қарай Жетісу, Батыс Қазақстан өңірінен, Павлодар қаласынан, Қостанай облысынан  жыршыларды шақырдық. Бұл жыр кеші жастар үшін рухани революция болады деген сенімдемін және ұлттық өнердің өміршеңдігін жас жыршылар арқылы көрсетеміз деген ойдамын.

− Біз қазір жаһандану дейтін үлкен үрдісті бастан өткерудеміз. Бұл әлеуметтік, экономикалық тұрғыдан және алпауыт мемлекет пен дамушы ел арасында байланыс орнатуда пайдалы.  Алайда осындай қоғамдық құбылыс кезеңінде рухани иммунитеті әлсіз мемлекеттердің жұтылып кететіні бар. Сан ғасыр бойы сақталып келген дәстүріміз, кешегі кеңес үкіметі кезінде бұрмаланған тарихи және мәдени дүниелеріміздің көпшілігі енді қалпына келіп жатқанда біз осындай бастаманы қолға алдық. Қазір жастар арасындағы өнерге қызығушылық жоғары деңгейде деп айта алмаймыз. Әрине бәрі заманауи әнді айтқысы, тыңдағысы, соған билегісі келеді. Бірақ соның тасасында ұлттық өнер қалып бара жатыр. Бірақ жастар мағынасыз әуен тыңдайды деп қарап отырмай, осы дүниені барлық саланы қамти отырып насихаттауымыз керек.