Біздің бүгінгі кейіпкеріміз Фаризат Ермағанбетова − облыстық қан орталығының терапевт дәрігері. Басқа дәрігерлерден ерекшелігі де сол Фаризаттың қызметтік міндеті донорлармен тікелей байланысты. Ол донор болуға келген адамды арнайы «инфодонор» бағдарламасына тіркейді. Бойын, салмағын өлшейді. Бойы 150-ден асу керек, салмағы 50 келіден асу қажет. Мұнан соң терапевт дәрігер Фаризат жалпы тексеру жүргізеді. Донордың бойында тері ауруларының белгілері жоғын анықтап, қан қысымын өлшейді. Әрбір донордың орталыққа келген кездегі қан қысымы 100-ден төмен, 160- тан жоғары болмау қажет. Ұйқысы қанық, денсаулығы қалыпты болғаны жөн. Дәрігер Фаризат донордың жұқпалы аурулармен ауырмағанын, ішімдік ішпегенін, тұқым қуалайтын аурулармен есепте тұрмайтынын анықтаған соң зертханаға жібереді. Қан тобына зертханалық зерттеулер жасалған соң, қорытындысына сәйкес дәрігер қайта қабылдайды.  Жүкті әйелдер мен бала емізетін аналар және қандай да бір аурумен есепте тұратын жандар  донор болмайды. Қан тапсыру кезінде донордың денсаулығы сыр берсе, дәрігердің дұрыс зерттеу жүргізбегенінен болады. Міне, Фаризаттың қызметінің басты жауапкершілігі де осында.

Қан орталығына тұрақты түрде қырық рет қан, жетпіс рет плазма тапсырған адамға «Құрметті донор» атағын беріп, арнайы төс белгі тағады екен. Бүгінде облыс бойынша 8 «Құрметті донор» бар. Қала тұрғыны Игорь Фролов ерікті түрде донор болғаны үшін жуырда «Құрметті донор − 2019» марапатына ие болыпты. Жыл сайын дәрігерлер дүниежүзілік донорлар күнінде орталықта барлық донорларға алғыс білдіреді.

− Жұмысым өзіме қатты ұнайды. Қызметтік міндетім тікелей донорлармен байланысты болғандықтан дертпен алысқан адамға үміт сыйлап, араша түсетін донорларды құрметтеймін. Бір адамның өмірін сақтап қалу үшін тек донорлар күнінде ғана емес, күндіз-түні тынымсыз еңбек етеміз. Жауапкершілігін сезінемін. Қашанда көмектесуге асығамын. Басты мақсатымыз сапалы қанды уақытылы жеткізу. Жас мамандарға әркез қолдау білдіретін, Қан орталығының директоры Еркебай Ілиясұлы мен ардагер дәрігер Рыскүл Кеңесарықызынан көп нәрсені үйрендім, - дейді Фаризат Асылбекқызы.  Жас та болса ұжыммен тез тіл табысып, орталықта екі жылдан аса еңбек етіп келеді. Рамазан есімді жігітке тұрмысқа шыққан  Фаризат ата-енесімен бірге тұрады. Қызметпен отбасылық өмірді қатар алып жүр. Болашақта Сыр медицинасының дамуына зор үлес қосып, білікті дәрігер болғым келеді дейді жас маман. Біз өз кезегінде Фаризатты медицина қызметкерлерінің күнімен құттықтап, қызметіне сәттілік тілеп тарастық.