Отандық жұлдыздардың бір тойдан алатын гонорарларының сомасы белгілі болды. Той ұйымдастырушылардың айтуынша, Ерке Есмахан бір тойдан екі миллион теңге алса, «МузАрт» тобының гонорары 10 мың долларға тең. Жұлдыздардың тойдан алатын гонорары елдегі экономикалық жайттарға байланысты өзгеріп тұрады. Мәселен, бірнеше жыл бұрын Қайрат Нұртас 10 мың долларға тойға шықса, араға аз уақыт салып ол гонорарын өсіріп жібергені туралы отандық БАҚ беттерінде жазылған-ды. Тойда дәуірі жүріп тұрған әншілердің қазіргі гонорары қандай? Той ұйымдастырушысының айтуынша, Қайрат Нұртас бүгінде 2,5 миллион теңгеге тойға шығады. Елдің ашуына тиіп, кейіннен кешірім сұраған Төреғали Төреәлі болса, бір той үшін 7000-8000 мың доллар алады. Жұлдызы жанып, актерлік кәсіптің жілігін шағып жүрген Тәуекел Мүсілімсіз қазір ешқандай фильм, ешбір клип түсірілмейтін болған. Қазіргі таңда оның тойыңызды басқарғанын қаласаңыз, 3000-5000 долларыңызды дайындап қойыңыз. Ең қымбат асабалардың бірі саналатын Азамат Сатыбалды да өзге жұлдыздардан арзан емес. Кәсіби актер қазіргі таңда мерекелік іс-шараны 1,5 миллион теңгеге басқарып беруге дайын.