Президент дер кезінде қабылданған шешімдердің нәтижесінде елде COVID-19 жұқтырғандар саны күрт өсіп кетпегенін айтты. Қазақстан президенті Қасым-Жомарт Тоқаев қазақстандықтардан карантинді сақтауды сұрады.

"Елімізде COVID-19 жұқтырғандар саны көбеюде, бірақ геометриялық прогрессиямен емес. Бұл дер кезінде қабылданған шешімдердің нәтижесі екені анық. Бірақ, індеттің шарықтау шегінен өткен жоқпыз", - деді ол өзінің Twitter-дегі парақшасында.

Сондай-ақ, мемлекет басшысы кімдердің қауіпсіздігіне аса мән беру керек екенін атап өтті.

"Азаматтарымыздан карантинді сақтауды сұраймын. Дәрігерлерге, полицияға, әскери қызметшілерге, волонтерлерге алғыс айтамын. Олардың қауіпсіздігіне баса мән беру қажет",- деп жазды президент.

Қазіргі уақытқа дейін Қазақстанда 1 711 адам коронавирус жұқтырды, оның 401-і жазылып шықты. 19 адам көз жұмды.