Олимпиада чемпионы Данияр Елеусінов чилилік Луис Норамбуэнуді жеңіп, кәсіби рингте жетінші жеңісіне қол жеткізді.

Жартылай орта салмақтағы жекпе-жек 25-інен 26 мамырға қараған түні Оксон-Хиллдегі (Мэриленд штаты, АҚШ) бокс кеші аясында өтті. Жұдырықтасу алты раундқа созылды. Кездесу қорытындысы бойынша қазақстандық боксшы төрешілердің шешімімен жеңіске жетті. Енді 27 жастағы спортшының еншісінде жеті жеңіс бар. Олимпиада чемпионы 2018 жылдың сәуірінде профиге алғаш шыққан. Жеті жекпе-жектің төртеуін АҚШ-та, екеуін Ұлыбританияда, тағы бірін Монакода өткізіп, жеңіске жеткен еді. Норамбуэно карьерасында екінші рет жеңіліс тапты, ол 10 мамырда төрешілердің шешімімен америкалық Вардгес Варданяннан (7-0, 1 КО) жеңілген. Сондай-ақ 27 жастағы чилиліктің активінде үш жеңіс және бір тең жекпе-жек бар.