Еуразия спорт кешенінде кикушинкай-кан каратэден жасөспірімдер, жастар, ересектер, әйелдер мен ерлер арасында Қазақстан Республикасының кубогы мәреге жетті.

ҚР Спорт және дене шынықтыру істері комитеті, Қызылорда облысының дене шынықтыру және спорт басқармасы, Ұлттық республикалық және облыстық киокушинкай-кан каратэ федерацияларының ұйымдастыруымен өткен дүбірлі бәсекеге республика аймағынан 14 команда, 500-дей спортшы қатысып, үздіктер анықталды.

Жарыс нәтижесінде Қызылорда облысының құрама командасы 6 алтын, 3 күміс, 3 қола медальды еншілеп, жалпы командалық есепте бірінші орынды жеңіп алды. Екінші орынға Батыс Қазақстан, үшінші орынға Қарағанды облысының командалары жайғасты.

Өңір намысын  20 спортшы қорғап, оның 12-сі жүлдеге қол жеткізді. Атап айтсақ, кумитэ бағдарламасы бойынша 10-11 жас аралығында Нұртуған Ертай (-35 келі), 12-13 жас аралығында Жалғас Анарбаев (-35 келі), 14-15 жас аралығында Әли Мейрамбек (-45 келі) пен Ислам Серікбай (-60 келі), 16-17 жас аралығында Әлішер Арман (-55 келі) және Нұрбақыт Жұмабек (18 жас, -65 келі) биік тұғырдан көрінді. Ересектер арасында сынға түскен Нұрбақыт Жұмабек ҚР спорт шебері нормативін орындады.

Нұрислам Кенжебекұлы (8-9 жас, -30 келі), Дінмұхаммед Балқашбай (12-13 жас, -40 келі) және Жеңісбек Сахи (14-15 жас, -45 келі)  күміспен күптелсе, Нұржан Жанболат (12-13 жас, -40 келі), Бексұлтан Шәйділда (14-15 жас, -55 келі) және Ерсайын Тілеу (16-17 жас, -70 келі) қоланы қанжығасына байлады.

Жарыс нәтижесіне сәйкес маусым айында Астана қаласында өтетін Азия чемпионатына облыстан Әли Мейрамбек, Ислам Серікбай, Нұрбақыт Жұмабек және Айбек Шаукиловтер бақ сынайды.