Sky Sports ақпаратынша, 24 жастағы футболшы үшін ағылшындық клуб 50 миллион евро төлеген. Бразилиялық аяқдопшы жаңа клубының қатарына 1 шілдеден бастап ресми түрде қосылады. Фабиньо қазірдің өзінде жаңа командасының формасымен суретке түсіп үлгерген.

«Осындай керемет клубтың ойыншысы болуды үнемі армандадым. Клубтың инфрақұрылымы өте ғажап. Мұндай деңгейдегі клубтың маған қызығушылық танытуы – мені толқытып жіберді. Ұзақ ойланбастан, келісім бердім. Енді бұл командадағы өзімнің ғажайып тарихымды қалыптастыруға тырысамын. Жаңа ұжыммен бірге титулдар жеңіп алатыныма сенемін» дейді ол.

Фабиньо «Монако» сапында 2013 жылдан бері ойнаған. 2017/18 футбол маусымында ол Франция чемпионатындағы 45 матчқа қатысып, 8 гол соқты. Франциялық клубқа ауысамын дегенше, ол 2012-2013 жылдары мадридтік «Реал» қатарында болған еді. Фабиньо – «Ливерпульдің» «Реалдан» жеңілгеннен кейінгі жасаған алғашқы трансфері.