«Ақмешіт жастарын» қызыға оқимын

«Ақмешіт жастары» газеті ұйымдастырған бейне байқау өз мәресіне жетті. Кеше «Сыр Медиа» шығармашылық үйінде вайн жеңімпаздарын марапаттады. Қазылар алқасының шешімімен  I орын Өмірзақ Нұрмұхаммед, II орын Жаңабай Сақтаған, III орын Данияр Жанәли меншіктеді, ал ынталандыру сыйлығы Жалғас Қадырбергенге бұйырды. Вайнның мақсаты – басылымды таныстыру, жастарды газет оқуға қызықтыру. Түкпір-түкпірден 200-ге аса видео келіп түсті. «Жастар ерекше байқау ұйымдастырды. Нәтижесі де жаман емес. Инстаграм парақшасынан жастардың талпынысын, түрлі-түрлі идеясын байқадық. Десе де жүзден жүйрік, мыңнан тұлпар жігіттер анықталды», – деді «Сыр Медиа» ЖШС директорының орынбасары Қаныбек Әбдуов марапаттау салтанатында.

Нұрмұхаммед Өмірзақ, Вайн жеңімпазы:

Өмірзақ Нұрмұхаммед Əділетұлы. Қорқы ата атындағы Қызылорда мемлекеттік университетінің Жаратылыстану факультетінде "Денешынықтыру жəне спорт" мамандығының ІІІ курс студенті.

– Жастар басылымын бұрыннан білген бе едіңіз? Әлде вайн арқылы таныдыңыз ба?

– Облыстық жастар басылымын бұрыннан білемін. Шынын айтсам екі жыл болды. Газеттің ішінде жастар алатын көп дүние бар. Қызыға тіпті жата-жастана оқуға болады десем артық айтқаным емес.

   – Вайн жөнінде қайдан естідіңіз?

– EEQO инстаграм парақшасынан көрдім. Сосын бақ сынап көруге тырыстым. Ойлана келе, осы идеяны түсіруге ұйғардым. Ата-анамның, достарымның пікіріне құлақ түрдім.

– Сіз түсірген видеоролик үздік деп танылды. Жалпы түсіруге қанша уақыт кетті. Идея қайдан туындады?

– Видео ролик бір ай бұрын түсірілген. Байқамай өшіріп алдық. Осылайша қайтара түсірдік. Екі жұмыс болды. Десе де еңбек ақталды.

– Байқаудың шешімін қайдан білдіңіз және көрген кезде қандай сезімде болдыңыз?

– Байқаудың шешімін "Ақмешіт жастары" газетінің инстаграм парақшасынан көрдім. Қанша жастың арасынан топ жарып шығу кез-келген адамды қуандырады. Қатты қуандым. Байқау ұйымдастырған сіздерге алғысым шексіз.

– Өмірдегі басты ұраныңыз қандай?

– Құласаң тұр, басқаларға көрсет өзіңнің кім екеніңді.

– Адам қандай сипатымен сыйлы болмақ?

 – Адам қанша көкке көтерілгенімен, топ етіп төменнен бір-ақ шығады. Өйткені әркім жеткен жеріне дейін барады, жығылған жерінде қалады. Атағыңа атың сай келсе ғана сыйлы боласың.

Сұқбаттасқан: Мөлдір САБЫРЖАН