2010 жылдары қалада фотограф кортежге мүлдем шықпайтын. Тек асабалар камерасымен ғана барушы еді ғой. Арнайы фотограф болмайды. Содан қасыма Батыр деген інімді ертіп алып, мешітте тұрамыз. Жас жұбайлар кортежбен келеді. Сол кезде өзіміз түсірген суреттерден жинақталған альбомды көрсетеміз. Көп жағдайда қызға көрсетеміз. Ол жігітті көндіреді. Өйткені ер адамға бәрібір ғой, суретті аса бір керексінбейді. Бұл да бір қызық кездер еді. Сонда бас аяғы 10.000 теңге табатынымыз. Кейде екеуміз екі тойға барып, 20.000 теңге тауып келеміз.

2011 жылы 10-20 мыңдап ақша жинап, камера сатып алдық. 2012 жылы Қызылорда облысы бойынша көптеген ауылдарды аралап жүріп, винеткаларын шығардық. Бүкіл қажетті құрал-сайманымызды арқаланып, ауылдарға барамыз. Мектеп директорына кіріп, бүкіл қағаздарын тегін істеп беруге келісіп, берілген бөлме де неше күн бойы жатып істейміз. Жалағаш, Қармақшы, Шиелі, Жаңақорған ауылдарының біразына бардық. Сөйтіп, әр ауылдан 100-150 мыңдай табамыз. Сөйтіп қыста винетка, жазда кортеждерді аңдып жүріп, жұмыс істейтінмін. Өзімізде несиеге алған машина бар еді. Кортеждегі басты көлік бағдаршамаға тоқтаған кезде терезесінен альбомды лақтырып жібереміз. Сосын мешіттен күтіп аламыз. Келген кезде міндетті түрде келісіп, тапсырыс беріп кететін.

Біраз тәжірибе жинаған соң, студия ашуды ниет қылып жүрдім. Сол арманыма 2013 жылы бір-ақ жеттім. Ең алғаш Қызылорда қонақ үйінің қасынан ашып, кейін Қызылорда медициналық колледжіне қарама-қарсы беттке орналастық. Жаңасын биыл аштық. Нөлден бастап өз қаражатыма салдырттым. Жаңаша бағытты байқап көрейік деп, ішіне тағы бірнеше кәсіп қостық. Мұнда қалыңдық көйлегін сататын орталық, сән салоны, той болатын жерді безендіру орталығы және фото-видео студиясы орналасқан. Айта кетейін, 2013 жылы «Орда» ресторанының басшысы Елмұрат ағамыз көп көмек қылды. Офисін беріп, аяқтан тұрып кетуімізге біршама жәрдемдесті. «Ордада» тапсырыс қабылдап, біраз жұмыс істедім. Осындай дәрежеге жетуімізге ол кісінің де көп септігі тиді.