Жетісайда қыздарды қорлаған өгей шеше өз істерін дәптерге жазып отырған

Түркістан облысының Жетісау ауданында болған жантүршігер оқиғаға қатысты жаңа деректер анықталды деп жазады Оtyrar.kz сайты.

Жәбірленген қыздардың туысқаны туған аналары бес жыл бұрын кетіп қалғанын жеткізді. Қыздардың әкесі екінші әйелімен отасқанына үш жыл болған. Бастапқыда бәрі дұрыс болыпты, алайда ұлдары туылғаннан кейін әйел адам өзгеріп кеткен.
Қыздардың әпкесі әйел адам ашуын өгей қыздарынан алады дегенді алға тартты. Ал қыздардың әкесі бұған қызғаныш сезімі себеп деп отыр.
Қыздардың үлкені әкелерін қатты жақсы көргендіктен бәрін жасырғандарын хабарлады. Аналары тастап кеткеннен кейін ер адам инсульт алған, қыздары оған бір нәрсе бола ма деп қорқады екен.
Басылым өгей шеше жазалау түрлерін жазу үшін арнайы дәптер арнағанын жазды.
Онда кімнің қандай жаза алғаны, сонымен қатар қыздар өздерін қалай ұстауға тиіс екені жазылған.
Үлкен қыздың сөзінше, өгей шешелері қыздардың шайына ыдыс жуатын сұйықтық құйып, оны ішуге мәжбүрлеген.
"Азаптау қаруы" ретінде ине, кәуәп таяқшалары, оқтау, пышақ және қысқыш пайдаланылған.
Еске сала кетейік, Түркістан облысында өгей шеше қыздарды ұрып-соқты деген күдікке ілінген еді.
Елді шуатқан әйел адамның екінші балаға аяғы ауыр болып шықты.