Исатай Әбдікәрімов атындағы Қызылорда аграрлық техникалық жоғары коллледжінде мемлекет және қоғам қайраткері, Социалистік Еңбек Ері, Ұлы Отан соғысының ардагері Исатай Әбдікәрімовтың 96 жылдығына орай «Сырдың ұлы перзенті» атты еске алу шарасы өтті.

Дәстүрге айналған бұл шара биыл оныншы рет аталып өтті. Ел үшін еңбек еткен қоғам қайраткеріне тағзым етіп, өмірі мен қызмет жолын жастарға насихаттау мақсатында өткен шарада сөз алған Қорқыт ата атындағы ҚМУ-дың профессоры Қазыбек Құдайбергенұлы тұлға жайлы естеліктер айтты.

− Ел басқарған ер тұлға  Сыр елінде дүниеге келіп,  аймақтағы бірнеше аудан орталығын, еліміздің Жоғары Кеңесін басқарды. Сүрінгенді сүйеп, жығылғанға демеу берген, көптің алғысын арқалаған үлкен жүректің иесі Истай Әбдікәрімовтің өмір жолы кейінгіге үлгі, колледж студенттеріне мақтаныш, – деді Қ.Құдайбергенұлы.

Мұнан бөлек Қызылорда қызмет көрсету және сервис колледжінің директоры Тәшім Оразбекұлы да Исатай Әбдікәрімов туралы естеліктер айтып, колледж жастарына ұлы тұлғаның қайталанбас дара жолын тіледі.

Ал Колледж директоры Ибадулла Құттықожа айтулы шарада колледждің белсенді, үздік оқытушыларын алғыс хаттармен марапаттады. Еске алу шарасы қонақтардың колледж мұражайымен танысуымен және баскетбол турнирімен жалғасын тапты.