Елдегі бокс жанкүйерлері 8 маусымды асыға күтіп жүргені белгілі. Сол күні отандық боксшылардың бір сыпырасы шаршы алаңға шығып, қарсыластарымен жұдырықтаспақ ниетте. Кештің басты жекпе-жегінде жерлесіміз Генадий Головкин өнер көрсетпек.  Айтулы кеште Олимпиада чемпионы Данияр Елеусінов те кезекті қарсыласымен кім мықтыны анықтауы тиіс болған. Дегенмен Данияр айтулы кештен тыс қалды. Бұл туралы кәсіпқой боксшы Геннадий Головкин де растады. «Былтыр Данияр маған қатысты өзінің позициясын білдірген еді.

Бұл – менің пікірім соған байланысты өзгеріп кетті деген сөз емес. даниярға кәсіпқой рингте тек табыс тілеймін. Ол өзі «біздің жолымыз әр бөлек» деп айтты. Оның менеджері де өзін кәсіби тұрғыда ұстаған жоқ. Бұл ретте Matchroom Boxing промоутерлік компаниясына қарсы ештеңе айта алмаймын. Олардың боксшылары біздің андеркартта жұдырықтасады. Мәселен, Елеусіновты алмастырған өзбек боксшысы. Біріншіден, бұрын айтқанымдай жас боксшылардың табысқа жетуіне көмектескім келеді. Әрине, бірінші кезекте қазақстандық боксшылар назарда болады. Көрермен үшін де, промоушен де қызықты боксшылар болса онда оларға андеркарттан орын дайын. Екіншіден, мұны ұлтараздық мәселеге айналдырып, көтеріп жатқандарға айтарым бар. Егер кәсіпқой бокста Азиядан көп боксшылар шығып жатса өз басым қатты қуанамын. Оның ішінде әрине, өз отандастарымның бой көрсеткенін қолдаймын. Айтпақшы, 8 маусымда андеркартта Ахмедовтан бөлек тағы екі қазақстандық өнер көрсетеді. Мен біреудің алдында бірдеңені дәлелдеуге тиісті емеспін. Менің «патриоттық сезімімді» тексерудің қажеті шамалы. Көп адамдарға қарағанда мен сөзбен емес, өзімді іспен дәлелдеп жүрген адаммын» деді Головкин.

 Данияр Елеусінов 8 маусымда болатын Головкин – Роллс бокс кешінің андеркартынан шығарылғаннан кейін, жаңа қарсылас тауып та үлгерді. Бұл туралы боксшының менеджері Зия Әлиев хабарлады. Оның айтуынша, Данияр 25 мамыр күні Оксон-Хиллде мексикалық Мигель Замудиомен жұдырықтаспақ. «Бізде қарсылас таңдап үлгеретіндей уақыт жоқ. Сондықтан кім бос сонымен келісімге келдік. Оны жеңіп, әрі қарай қадам басуымыз керек. Жекпе-жек сегіз раундқа жоспарланып отыр» дейді Әлиев. 27 жастағы Мигель Замудио Алонсо кәсіпқой рингте 56 кездесу өткізіп, 43 рет жеңіске жеткен. 12 мәрте жеңіліп, бір рет тең түскен. Ал 27 кездесуді мерзімінен бұрын аяқтапты. Бұған дейін Мигель Замудио Алонсо өзбекстандық Шахрам Гиясовпен кездесіп, жеңіліп қалған еді. Ал Гиясов пен Елеусіновтың Рио олимпиадасының финалында кездескені белгілі.