Финалдық матч әйгілі «Маракана» стадионында өтті. Алғашқы гол 15 минутта соғылды. Габриэль Жезустың пасын сәтті пайдаланған Эвертон Перу қақпасынан саңылау тапты. Мұнан кейін 44 минутта қарсыластар сапынан Хосе Паоло Герреро есепті теңестірген. Алайда 1 тайм тәмам боларға дейін Жезус өзі де гол соғып, бразилиялықтарды алға шығарып үлгерді. Дегенмен матч қаһарманы атанудан үмітті Жезус 70 минутта екінші сары қағазын алып, алаңнан қуылды. Алаң иелерінен адам саны азайғанын Перу құрамасы пайдалана алған жоқ. Есесіне Ришарлисон 88 минутта пенальти орындап, есепті 3:1-ге жеткізді.

Әлем чемпионатын бес рет жеңіп алған Бразилия Америка кубогын осымен оныншы рет ұтып отыр. Соңғы рет 12 жыл бұрын құрлықтық додада оза шапқан. Ал осы турнирде үшінші орынды Чили құрамасын жеңген Аргентина иеленді.  Бразилия құрамасы сапында  36 жастағы қорғаушы Дани Алвес аталмыш турнирдің үздік ойыншысы атанды. Ол осымен өзінің мансабындағы 40-трофейді қанжығасына байлады. Бұл тұрғыда жер бетінде ешқандай футболшы Алвеспен теңесе алмайды.