МӘСКЕУДЕГІ БЕЙБІТ ШЕРУДІҢ СОҢЫ НЕМЕН АЯҚТАЛДЫ?

Сенбі, 27 шілдеде Мәскеуде қалалық дума депутаттығынан үміткер тәуелсіз кандидаттарды қолдаған акция өтті. Кандидаттар әуел баста сайлаушылармен кездеспек болған. Бірақ полиция оларға кедергі келтірді: акция басталмай тұрып тәуелсіз кандидаттар ұсталды. Кейін акцияға келгендердің бәрін ОМОН жасақтары күш қолданып, ұстады. "ОВД-Инфо" құқық қорғау порталының дерегінше, мыңнан астам адам ұсталған. ІІМ 1074 адам ұсталғанын хабарлады. Митингі кезінде полиция резеңке таяқ қолданды, ондаған адам зардап шекті, - деп хабарлады Азаттық.

Полиция қызметкерлері жергілікті депутат Александра Парушинаны резеңке таяқпен ұрған. Ол есінен танып қалды.

Полиция қызметкерлері акцияға таңертеңнен бастап дайындалған. Жергілікті әкімдік маңындағы Юрий Долгоруков ескерткішін темір қоршаулармен қоршап, Тверь көшесіне қаз қатар автозактар тізіп қойған. Жергілікті уақыт бойынша күндізгі сағат 12.30 шамасында Тверь көшесі тұтас жабылған. Полицейлер ары-бері өткендердің бәрін ұстап, тіпті жерасты өткеліндегі адамдарды да автозакқа отырғызған. Олар адамдардың топтасуына мүмкіндік бермей, әкімдік маңынан қууға тырысқан.

Полиция азаматтарды ұстай бастаған кезде көпшілік "Өткіз!", "Путинсіз Ресей", "Чекистер билігі жойылсын!" деп ұрандатқан.

Күштік құрылымдар жергілікті әкімдік ғимараты маңына адамдарды жібермеді.

Бірақ кейбір жерлерде шерушілер полиция шебін бұза алды.

Полиция азаматтарды оқиға орнынан бір жаққа қарай тықсыра бастады.

Пушкин алаңы маңында полиция көп адамды ұстады.

Полиция азаматтарды резеңке таяқпен ұрып, ұстады.

Ұсталғандар арасында әйелдер мен егде адамдар болды.