Чехияның Прага қаласында өткен ән байқауына Сыр өңірінен екі өнерпаз қатысты. 8 бен 12 жас арасындағы қатысушылар арасында Дінмұхамед Төлеубайдың бағы жанды. Сырдың Димашы классикалық шығармаларды орындап, қазылардың жоғары бағасына ие болды. Сөйтіп, біздің Дінмұхаммед «Бриллиант дауысты әнші» атанды.

         Ал 16 жастағы Арайлым Берік эстрада жанрындағы шығармаларды орындады. Ол 35 жасқа дейінгілер арасында бақ сынағанына қарамастан жүлделі бірінші орынды иеленді. Айта кетейік, қос қызылордалық өнерпаз Чехияда өткен «Созвездие добра» халықаралық ән байқауына да қатысып, екеуі де Гран-при иегері атанды. Қос өнерпаздың ұстазы  Қазақстанның еңбек сіңірген әртісі − Қаракөз Ақдәулетова.

         Ақжолтай хабарды сүйіншілей отырып, жас таланттардың өнер кемесі өрге жүзе берсін деп тілек қосамыз.