2019 жылдың 11 желтоқсан күні Қызылорда облысы қорғаныс істері жөніндегі департаментінің саптық алаңында Қызылорда облысының жастар саясаты мәселелері басқармасының "Жас сарбаз" жасөспірімдер әскери патриоттық қозғалысы Республикалық қоғамдық бірлестігінің Қызылорда облыстық филиалы қолдауымен және "Кәусар" мамандар орталығы қоғамдық бірлестігінің ұйымдастырумен "Әскердегі 1 күн" жиыны аясында әскери - техникалық мектеп курсанттарының әскери ант қабылдау рәсімі өтті. Жиынға "Жас сарбаз" жасөспірімдер әскери патриоттық қозғалысының тәрбиеленушілері қатысты.

Мұнтаздай киініп, иықтарына қаруларын асынған жас курсанттар саптан нық қадаммен алға суырылып шығып, бірінен соң бірі Отан алдында өздеріне жүктелген міндеттерді мінсіз орындауға, қиыншылықтарды табандылықпен көтеруге, әскери істі оқып үйренуге ант қабылдады.

Аталмыш шараның ресми бөлімі аяқталған соң, Қызылорда облысы қорғаныс істері жөніндегі департаменті бастығының орынбасары - подполковник Алмат Алмасұлы Жакипов, ант қабылдаған курсанттарды ұмытылмас күндерімен құттықтап, елге адал қызмет ететін офицер болатындарына сенім білдіріп, толағай табыстар тіледі.