Биыл жастар арасында әскери-патриоттық жұмыстарды жетілдіру және олардың отаншылдық, ұлттық сезімдерін дамыту мақсатында «Айбын» облыстық әскери-патриоттық жиыны V рет ұйымдастырылды. Әскери-қолданбалы спорттық жарыс қатысушыларына Жастар саясаты басқармасының басшысы Қуаныш Жанұзақов, ҚР Қорғаныс министрлігі «Қызылорда облысының қорғаныс істері жөніндегі департаменті» республикалық мемлекеттік мекемесінің тәрбие идеологиялық және әскери-патриоттық жұмыстары жөніндегі орынбасары Алмат Жақыпов сәттілік тілеп, сөз сөйледі.

Жастар саясаты мәселелері басқармасы және облыс әкімдігінің қолдауымен, сондай-ақ «Самғау» жастар қоғамдық бірлестігінің ұйымдастыруымен өткізілген жиынға аймақтан 9 команда қатысып, кермеде тартылу, арқаға жатып денені көтеру, арқан тарту сынды сегіз әскери-қолданбалы спорт түрінен бақ сынады. Сайыс нәтижесінде жалпы командалық есеп бойынша бас жүлдені Шиелі ауданы иеленді. Енді республикалық «Айбын» әскери-патриоттық жиыны 17-22 маусым аралығында Қарағанды облысындағы Спасск әскери полигонында өтеді. Облыс құрамасын шығарып салу, күтіп алу жұмыстары салтанатты түрде ұйымдастырылатын болады.