Кәсіп бастау көптің қолынан келгенмен, сын сағаттарда қиындыққа төтеп беріп, бастаған шаруасын тұралатпай алып кететіндер көп емес. Талай қиын кезеңдерді басып өтіп, күні бүгінге дейін кәсібін дөңгелетіп отырғандар қазір нарықтық экономикаға айтарлықтай демеу болып отыр. Соның бірі сонау тәуелсіздіктің алғашқы жылдары кәсіпкерлікке бет бұрған облыстың беделді кәсіпкері, «Раим» ЖШС бас директоры – Ерлан Раимов.

Ол бүгінде мейрамхана бизнесімен қатар, құрылыс, сауда-саттықпен айналысып, жергілікті тұрғындарды жұмыспен қамтып отыр. Ұлттық аспаздық өнерді дәріптеп, әлемдік деңгейде ұлттық бренд ретінде танытуды мақсат тұтатын кәсіпкер шетелде қазақ тағамдарына ынта-ықыластың жоғары боларына кәміл сенеді. Өзі негізі қалаған «Қыз Жібек» мейрамханасы әр жылдары облыстық және республикалық байқаулардың жеңімпазы бо­лумен қатар, «Жыл мейрам­ханасы» ретінде танылғаны бар. Ал осыдан тура үш жыл бұрын «Ұмытылған ұлттық асхана» республикалық бай­қауының сыйлығын алған еді. Көне аспаздық өнерді қайта жаңғыр­тып, ұлттық болмыстан ажыра­мауды үндейтін кәсіпкер артта қалған қиын-қыстау кезеңді былай еске алды.

– Мен өз бизнесімді жүз дол­лар қаржымен бастаған адаммын. Қазір мұны жас балаларға үлгі болсын деп айтып отырмын. Әу бастан кішкентай дүңгіршекті жалға алып, сусын­дар сата бастадым. Ол кезде ел білетін кәсіпкерге айналып, үл­кен бизнеске аяқ басамыз деген­дей арман-ойлар болған жоқ. Бар ниетім – отбасымды асырау еді. Кеңес Одағы құлап, тәуел­сіз­дікке енді қол жеткізген алғашқы жылдары ел экономикасы үшін де қиын-қыстау кезең болды ғой. Инфляция жоғары еді. Әйтеуір, көп қиындықты еңсеріп, мей­рамхана бизнесіне кірісіп кеттік, – дейді кәсіпкер.

Әсіресе, егемендіктің алғаш­қы жылдары көптеген бизнес­мен­дердің өз кәсібін дөңгелете алмай, банкротқа ұшырағанын есітіп-біліп жүрген Ерлан Қани­ұлы ұзақ жылдар бойы аянбай еңбек етіп, отбасының қолдауы­ның арқасында аяққа нық тұрып, кәсібін кеңейтіп отырғанына шүкіршілік етеді.

– Біздің кәсіппен айналысып келе жатқанымызға 28 жыл болды. Яғни, біз тәуелсіздіктің алғашқы жыл­дарынан бастап жаңа нарық­тық қатынастарға икемделіп, жұмыс істей бастаған егемен елдің аза­маттарымыз. Шындап келгенде, бүгінде 28 жыл бойы бизнеспен айналысып келе жат­қан, қиын­дықты еңсере білген кәсіпкерлер өте аз. Көптеген кә­сіпорындар банкротқа ұшырап, жабылып та жатты. Еліміз бір­неше экономи­калық дағдарыстан өтті. Ал мұн­дай қиындықтарды жеңіп шығу үшін табандылық пен қажыр-қайрат керек, – дейді.

Ерлан Раимов мей­рам­ханадан бөлек, пластикалық және ағаш шеберханасының қо­жайыны. Сондай-ақ құрылыспен де айналысады. Кәсіпкер тіпті 600 адамды сыйғызатын асхана ашқан болатын. Ал осыдан біршама жыл бұрын облыс­тық орталық мешіттің ау­мағында 540 шаршы метр жерді алып жатқан жеке ғимарат іске қосылған. Онда жуынып-шайыну бөлмелері орналасқан. Жалпы саусақ бүгіп санай берсең, оның бастаған істері де, елге қарасып, қол үшін созған кездері де аз емес. Оған жоғарыда айтқандарым дәлел бола алады деп ойлаймын. Міне осылай.

Тағы бір айта кететін жайт, кәсіпкер Ерлан Раимов AlmaU университетінің бастамасымен қолға алынған «Аты аңызға айналған кәсіп­керлер» кітабының тізіміне енгізілген еді. Ондағы мақсат – жас ұрпаққа тәуелсіздіктің алғашқы жылдары кәсібін бастап, бар қиындықты еңсеріп, ел игілігі үшін еңбек етіп жатқан азаматтарды үлгі етіп көрсету.