Алматыда спорттың жеті түрі бойынша Конфедерация кубогының жеңімпаздары анықталды.

Жүлде қоры 165 миллион теңгені құраған жарыстың ақтық мәресі тартысты өтті. Бокстан Түркістан облысына тең келер ешкім табылмады. Құрамында Қайрат Ерәлиев, Сәкен Бибосынов, Бек Нұрмағанбет, Бекдәулет Ибрагимов сынды саңлақтары бар команда жартылай финалда Қарағандының қырандарын ұтса, ақтық айқаста елордалық былғары қолғап шеберлерінен басым түсті.

Еркін күресте Нұр-Сұлтаннан келген жігіттердің бағы жанса, грек-рим күресінде Шымкент қаласының өкілдері шашаларына шаң жұқтырмады. Олардың екеуі де шешуші тұста Алматы облысы балуандарынан басым түсті.

Қазақ күресінен өткен бәсекеде Солтүстік Қазақстан облысының сайыпқырандарынан жасақталған «Қызылжар арландары» клубы алдына жан салмады.

Сонымен қатар Алматы қаласының түлектері екі бірдей спорт түрі бойынша бас жүлдені олжалады. Олар таэквондо мен каратэ өткен жарыста топ жарды. Ал татамидегі тартыста Шығыс Қазақстан облысының дзюдошылары дараланды.