Облыстық  Жас ұлан ұйымы  2011 жылы  Тұңғыш Президент Н.Назарбаевтың қолдауымен   құрылды. Қазір аймақ бойынша  106 000 жас ұлан  бар. Биыл облыстық жастар  саясаты мәселелері  басқарамасының  қолдауымен, облыстық  «Жас ұлан»  ұйымының  ұйымдастыруымен өткен «Ұланымыз ұлы елдің» ҮІІ  облыстық слетіне  200  делегат қатысып, 50 оқушы  жас ұлан қатарына қабылданды. Қабылдау рәсіміне Әлем чемпионатының алтын жүлдегері  Ғани Әділсерік, облыстық тарихи-өлкетану музейінің ғылыми хатшысы Асхат Сайлау, облыстық тарихи-өлкетану музейінің бөлім меңгерушісі Эльзира Нағашыбайқызы, «Самғау» жастар сыйлығының иегері, қоғам белсендісі Сағатбек Қуанышбайұлы және қалалық  білім бөлімінің   бас маманы Бек  Бексұлтанұлы және білім беру ұйымы мен жастар ұйымының   өкілдері, ата-аналар  қатысты.

     «Ұланымыз ұлы елдің» ҮІІ  облыстық слетін  облыстық жастар саясаты мәселелері басқармасының басшысы Қуаныш Қуантқанұлы  ашып, жас ұландарды  жобадағы   жетістіктерімен құттықтап, сәттілік  тіледі.

     Слет  аясында Жас ұлан қатарына қабылдау рәсімі өткізіліп, «Арманың  барда, адымда  алға!», «Жас ұлан жетістік жолында!» жылдық жобалар үздіктері  марапатталды. Жыл бойы шараларға  белсене араласып,  балалар әлемінде өзіндік қолтаңба  қалдырған  ұландар «Зерек  ұрпақ», тәлімгерлер «Тәлімді  тәлімгер» арнайы  номинациясымен марапатталды.Аталған екі жоба бойынша үздік шығып, жыл бойы жас ұландарға хабар таратқан Арал ұландары «Мыңнан тұлпар» номинациясын иеленсе, жастар жылы аясында балаларға  арналған елуге жуық мультфильм түсірген Жалалғаш  ұландарына «Рухты жастар»  номинациясы тапсырылды. Облыстық  слеттің ең құрметті  сәті, ұландардың «Дария жағасындағы қала» акциясы бойынша жасаған жұмыстарының  нәтижесінде  жарық  көрген  «Дария жағасындағы қала»  кітабының  тұсаукесері болды. Слетте  Сыр ұландарына жол тартқан  бұл кітап, ұландар үшін үлкен құндылық болды. Жас ұландар үшін жылдық қорытынды болып саналатын дәстүрлі слет биыл өзгеше болды. Жастар жылы асында өткен «Арманың барда, адымда алға» үлкен жоба жеңімпаздарына   Ұларбек Нұрғалымұлының  «Дайағашшы» кітабы  табысталды. Сөйтіп ұландардың кітап қоры екі кітаппен бірден толықты. «Дайағашшы» кітабы  біздің жаңа жобаларымыздың бастауы болады.

    Слеттің басы, әлеуметтік  жобалар  аясындағы шаралар бойынша «Ұлттық құндылық Жас ұлан қолымен» қолөнер және сурет  жәрмеңкесімен басталды.  Жәрмеңкеге  жарыса қатысқан ұландар, одан түскен қаржыға үйден оқитын достарына тосын сый жасайтын болады. Аталған шара барысында «Жас Ұлан» бірыңғай     балалар мен жасөспірімдер ұйымдарының қызметін ұйымдастыру»  тақырыбында мектеп тәлімгерлеріне  арналған  семинар-тренинг ұйымдастырылып, тәлімгерлер жобаларды таңдау, оны іске асыру жолдарымен танысып, «Эко-әлем» экологиялық ойынын ұйымдастыру тәсілдерін үйренді. Қатысушы делегат-ұландарға  музей сағаты ұйымдастырылып, облыстық тарихи-өлкетану музейіне саяхат жасады.Слет  бағдарламасына  атқарған жобаларын  қосқан Сыр ұландары өздерінің жаңа қырларын аша түсті. Жетістікке құлшынған ұландар өздеріне  ізбасарларын ертіп, халық әндерін шарықтата шырқап, саханда қазақтың үш биі  болып сөйледі. Жоба аясында ашылған орталық ұландары Қожа болып ән шырқап, жетістіктерімен бөлісті, ұлттық  құндылықтарды   насихаттады.

    Облыстық слетте жан-жақтан бас қосқан ұландар жаңа  жобалары мен тың идеяларымен бөлісті. Бір-бірінің білімі мен өнеріне қол соққан ұландар келер жылғы  еріктілер жылында да жас ұландық қолтаңба қалдырып, жетістік жолында  қадамдар жасай береді.