Елбасының алға қойған міндеттерін жүзеге асырып, қоғамдық жұмыстарға белсене араласқан жасұландықтар бұл қадамын туған тарихын насихаттау  деп түсіндіреді. Кезінде қазақтың алғашқы астанасы атанып, сол кездегі зиялы қауымның табаны тиген, жылдан-жылға жасарып, жайнап, өрісін кеңге жайған Қызылорда қаласындағы тарихи-мәдени ескерткіштерді  насихаттау үшін жасұландықтар акцияға зор мақтанышпен қатысты.

«Рухани жаңғыру» бағдарламасында тарихи-мәдени ескерткіштерді зерттеп, зерделеуге   айрықша маңыз бергені белгілі.  Елбасы мақаласындағы  «Туған жер»  жобасын іске асырған  бұл шараның  жоспары талқыланып, іске асырылуына зор мән берілді. Қызылорданың  төрінде   салтанат құрған  Жалаңтөс Баһадүр, Бұқарбай батыр, Сыр Ана, Ақмешіт мешіті, Айтбай мешіті, Қорқыт Ата кітабының 1300 жылдығына арналған ескерткіш-кешені, Сыр Сүлейлері, Абай аллеялары  және тағы басқа ескерткіштерге саяхаттады.  Аталмыш шараға 100-ден аса жасөспірім қатысты.

 «Дария жағасындағы қала» жобасы  аясында  жасұландықтар әсем қалада қуана саяхаттады. Ескерткіш авторларына ықыласпен қол соқты. Жақсылардың басын қосқан қасиетті жерде туғанына  ризашылық білдірді. Жоба аясында ырыс пен дәулет қонған бақ мекеннің сәулет-салтанатына қанығып өскен ұландар болашақта сүйікті қалалары туралы роман жазып, кино түсіреміз, алты алашқа мәлім қаланы әлемге танытамыз деп уәде етті. Оған біз де сенім білдірдік!

Қызылорда    облыстық     жастар      саясаты     мәселелері  басқармасының «Жас ұлан» ББЖ ұйымы «Жас Ұлан» балалар мен жасөспірімдер қозғалысын дамыту» әлеуметтік  жобасы  аясында  жүзеге асырылған «Дария жағасындағы қала» тақырыбындағы экскурсияға балалармен бірге тәлімгерлер, тарихшылар, Қызылорда облыстық тарихи-өлкетану музейінің ғылыми хатшысы  А.Сайлау  қатысты.