Алматыда барлығы қанша медицина қызметкері вирус жұқтырғаны белгілі болды
Орталық қалалық клиникалық ауруханада 215 пациент емделіп жатыр. Олардың 18-і індетке шалдыққаны анықталды. Қазіргі жағдай бойынша Алматы қаласында барлығы 218 медицина қызметкерінен коронавирус табылды. Бұл туралы қаланың қоғамдық денсаулық сақтау басқармасының басшысы Тілеухан Әбілдаев мәлімдеді, деп хабарлайды Sputnik Қазақстан тілшісі."Соvid-19 вирусын жұқтырған медицина қызметкерлерінің жалпы саны 218 адамды құрайды", - деді Әбілдаев онлайн брифингте.
Соның ішінде Орталық қалалық клиникалық аурухананың 182 қызметкері, Балалар қалалық клиникалық жұқпалы аурулар ауруханасының 30 маманы, Жедел шұғыл медициналық жәрдем станциясының 2 қызметкері, №1 қалалық клиникалық аурухананың 1 қызметкері және №11, 32, 12 қалалық емханалардың бір-бір қызметкері бар.
"Мұның алдында екі медицина қызметкерінің жағдайы ауыр болатын. Бүгін беті бері қарады. Қазіргі таңда 25 әріптесіміздің жағдайы орташа. Ал қалғандарының денсаулығы қанағаттанарлық", - деді ол.
Айтуынша, қазір Орталық қалалық клиникалық ауруханада 215 пациент емделіп жатыр. Олар коронавирусқа анализ тапсырған. 18 науқастың індетке шалдыққаны анықталды.
Бұған дейін дәл осы аурухананың бас дәрігері қызметінен кеткені хабарланған еді. Оған себеп – медицина қызметкерлерінің жаппай вирус жұқтыруы.
