Ақпарат және қоғамдық даму министрі Аида Балаеваның айтуынша, қазақстандық бұқаралық ақпарат құралдары қазан айына дейін салықтан босатылады. Министрдің айтуынша, баспасөз жарнамадан түсетін табыстың 60 пайызынан айырылуы мүмкін.

Министр халыққа есеп берген кезде: «Дағдарысқа қарсы шаралар аясында бүгін Парламент 2020 жылдың 1 сәуірінен 1 қазанына дейін еңбекке ақы төлеу қорынан салықтар мен міндетті аударымдарды төлеуден босатуды қарастыратын заңнамаға түзетулерді мақұлдады.
Парламент заң жобасын қабылдады, оның аясында коммерциялық теле, радиоарналарды аналогтық және эфирлік цифрлық телерадио хабарларын тарату қызметтеріне ақы төлеуден 2020 жылдың 1 шілдесінен 31 желтоқсанына дейін босату қарастырылған», – деді.