– Құрметті Сыр жастары! Сіздерді 12 тамыз – Халықаралық жастар күнімен құттықтаймын! Көзiнде – от, сөзiнде – жалын бар, жанынан ары қымбат жастар – қай кезеңнің де, қай мемлекеттің де еңселі ертеңі, баянды болашағы. Жаһандық жаңалықтар жаршысы, өнімді өзгеріске құмар, ілкімді үдерістің басында жүретін, жалынды жасы бар ел – ешқашан көш соңында қалмасы анық. Жас буын бүгінгі күні де қоғамның белсенді мүшесі екенін дәлелдеуде. Әсіресе пандемия жағдайында жастар да ел басына төнген қауіпті еңсеруде қажырлық пен қайраттылық танытуда. Ел үшін жасаған әрбір елеулі еңбек, берекелі бастама – жастардың Отан алдындағы перзенттік парызы деп білеміз. Жастар мерекесімен құттықтай отырып, халқымыздың амандығы мен ертеңі үшін қабылданған карантин қағидаларын да қатаң сақтауға шақырамын. Карантин кезінде құқық бұзушылыққа жол бермей, қуанышты тойды кейінге қалдыра тұрып, жақындарымызға, болашаққа жанашырлық танытайық. Жастық жігерлеріңіз ешқашан жасымасын, – деді Қуаныш Қуантқанұлы.
үгін облыстық Жастар ресурстық орталығында жаңа Syr jastaru.com сайтының тұсаукесер шарасы өтті. Енді облыс, қала, аудан жаңалықтары, күнделікті өткізілген шараның мәліметі осында салынады. Сондай-ақ жас көшбасшылармен танысуға мүмкіндік бар. Жастармен бірлесе жұмыс істейтін ұйымдармен тікелей хабарласу үшін байланыс нөмірлері де көрсетілген. Ең қызығы, қажетті кітап қорының электронды нұсқасы қамтылған. Жастардың қызығушылығын анықтау мақсатында сауалнамалар ұйымдастыру тетігі де бар. Сондай-ақ «Бала – бақыт, бала – болашақ» тақырыбында ата-аналарға арналған интенсивті курс орталықтың әлеуметтік желілердегі барлық парақшаларына жүктелді. Тікелей эфир көмегімен өткізілген шараға педиатр, бала психологы, логопед маман шақырылып, барлық сауалдарға жауап берді.
Орталық қызметкерлері Жастар күніне орай тағы бір тың жобаны жүзеге асырды. Бұл бастама өзге қалаларда әлі қолға алынған жоқ. Ол не дейсіз ғой? Енді осы орталықта істен шыққан компьютерлер жинақталып, ІТ мамандар жаңа компьютер жинап шығарады. Оны "Мектепке жол" акциясы аясында тұрмысы төмен отбасыларына табыстайды.
– Бұл бастама өзге өңірлерде жоқ. Біз алғаш рет қолға алдық. Жаңадан жиналған компьютерлерді 1 қыркүйекте тұрмысы төмен бірнеше отбасыға тегін таратамыз. Тұрғындар істен шыққан компьютерлерді ІТ паркке әкеледі, мамандар оның ішіндегі қажетті бөлшектерді пайдалана отырып, жаңа компьютер жинайды. Олар жаңа оқу жылына орай мұқтаж отбасының балаларына табысталады. Осы орайда істен шыққан компьютеріңізді біздің ІТ мамандарға табыстасаңыздар болады. Осылайша сіздер де игілікті іске қолдау білдіресіздер, – деді орталық директоры.
Орталықта ІТ кітапхана бар. Бұл кітапхана қаншама адамның зейінін ашты. Енді аталмыш кітапхана оқу орталығына айналды. Ара қашықтықты сақтай отырып, бетперде мен антисептикті пайдалана отырып, оқушылар ноутбукпен сабақ орындай алады. Оған қоса арнайы теледидары бар. Оқу орталығында тұрмысы төмен, мүмкіндігі шектеулі балалар білімін жетілдіре алады. Оған қосымша арнайы волонтерлер мен ерікті мұғалімдерде қарастырылады. Сонымен бірге интернет желісі қолжетімді.
Жастар арасындағы қылмысты болдырмау мақсатында орталық қызметкерлері біршама жұмыстар атқаруда. Қылмыс жасаған жастармен бірлесіп жұмыс істеп, олардың қылмысқа бармауын назарға алып келеді. Бүгінде орталықтың қызметі туралы білмейтін жас жоқ. Осылайша әркім өзіне керекті дүниені осы орталықтан ала алады. Бүгінгі шара барысында облыстық жастар ресурстық орталығының директоры Бауыржан Мәстеков пен Қызылорда облысы бойынша қылмыстық-атқару жүйесі департаментінің бастығы екіжақты ынтымақтастық туралы меморандумға қол қойды. Мақсат – психологиялық кеңес беру, жастарға ой салу және жасаған қылмысты қайталамауына септігін тигізу.
Жастар күніне байланысты өңірде «Жастар апталығы» жарияланды, оның негізінде түрлі форматта 72 шара карантин тәртібінде ұйымдастырылды. Сонымен қатар өңірдегі жастар ұйымдарының қатысуымен әлеуметтік желілерде онлайн квест ойындары, "Тик ток жұлдызы" тақырыбында трендке айналған бейнероликтерді түсіру байқауы, әл-Фарабидің 1150 жылдығы және ұлы ақын Абай Құнанбайұлының 175 жылдығына орай «Жастар жырлайды» жас ақындардың әдеби кеші, түрлі онлайн форматта кездесулер, мемлекеттік бағдарламалар бойынша түсіндірме жүргізу шаралары жүзеге асты.
– Тек бізде ғана емес, әлем жұртшылығы жастардың алып күш иесі екенін мойындаған. Сондықтан бір жылдың айтулы күні арнайы жастар мерекесі ретінде күнтізбеде белгіленген. Бұл мереке өзіндік айшыққа толы. Биыл да Сыр жастары атаулы күнге жақсы дайындалды. Мәселен, орталықтың отбасы істері және бұқаралық спортты дамыту бөлімінің бастамасымен «Карантиндегі махаббат» онлайн сайысы өткізілуде. «Өткеніңді білмейінше, болашағыңды болжай алмайсың» деген пікірді ұстанған және тарихты қастерлей білетін Сыр жастары рухани шаралардан да шет қалмақ емес. «Birgemiz: Asyl Mura» бағыты бойынша олар Қоғалыкөл іргесіндеі "Қыш қала" архиологиялық аймағына экскурсияға барады. Танымдық шара тарих парақтарын ақтара отырып, жаңа әсермен оралуға сеп болады, – деді Бауыржан Мәстеков.
– Жастарды мерекесімен құттықтаймын! Айтулы күнде қаншама іс-шараның өткізілгені белгілі. Көпшілігі онлайн форматта өтті. Жастар өзіне қажетті ақпараттарды алды деген ойдамыз. Еріктілерге алғысым шекіз. Оларды марапатымен құттықтаймын. Біз бұдан кейін де халықтың жанынан табыламыз, – деді "Волонтерлер фронт офисінің" жетекшісі Болатбек Айтбенбетов.
Иә, бүгінгі күні біршама жастар марапат биігінен көрінді. Оларды облыстық жастар саясаты мәселелері басқармасының басшысы Қуаныш Қуантқанұлы марапаттады. Жыл басынан бері және пандемия кезінде ерекше еңбегімен көзге түскен белсенді, ерікті жастарға алғыс хат табысталды.
Біз де оқырмандарымызды Жастар күнімен құттықтаймыз!
Мөлдір САБЫРЖАН
Суретті түсірген Нұрболат НҰРЖАУБАЙ