Ағымдағы жылдың 7 айында тіркелген қылмыстық құқықбұзушылық 37 пайызға (3798-ден 2403-ке) төмендеді. Сонымен қатар, қоғамдық орындарда (-35,7%), көшелерде (-28,7%), топпен (-32,9%), мас күйінде (-20,9%), бұрын сотты болғандармен (-29,2%), жасы кәмелетке толмағандармен жасалған қылмыстар азайды (-21,1%). Облыста тіркелген жол апаттары 37 (350-ден 221-ге), қайтыс болғандар 39 (72-ден 44-ке), жарақат алғандар 36 пайызға төмендеді (410-нан 262-ге). Талдау көрсеткендей, көлік оқиғаларының басты себебі жылдамдықты арттыру, қарсы бағытқа шығу, автокөлікті мас күйде басқару болуда. Бұл туралы Қызылорда облысының Полиция департамент бастығының бірінші орынбасары, полиция полковнигі Шамшидин Егенбердіұлы мәлімдеді.

Жыл басынан жол қозғалысын бұзудың 64 мың 797 дерегі, оның ішінде жол апаттарына тікелей әсер ететін автокөлікті құжатсыз басқарудың 5 441, автокөлікті мас күйде басқарудың 946, қарсы бағытқа шығудың 174 дерегі анықталды.

Осыған орай айта кететін мәселе, жыл басынан автокөлікті мас күйде басқарған 946 жүргізуші ұсталып, оның 413-і әкімшілік қамауға алынды.

Жыл басынан орын алған 221 жол-көлік оқиғасының 18-і мас жүргізушінің кінәсінен болып, нәтижесінде 7 адам қайтыс болса, 23 адам жарақат алған.

Тамыз айының 10 мен 16-сы күндері аралығында «Мас жүргізуші - қылмыскер» атты шара өткізуде.

Бұл шараның 3 күнінде жол қозғалысы ережесін бұзудың 765 дерегі және көлік құралын масаң күйде басқарудың 14 дерегі әшкерленді.

Тұрғындардың түнгі тыныштығын сақтау мақсатында, Ішкі істер министрлігінің нұсқауына сәйкес облыс көлемінде тамыз айының 5 мен 8 күндері аралығында «Мотоцикл» шарасы өткізілді.

Нәтижесінде 224 әкімшілік құқық бұзушылық анықталса, оның ішінде мас күйде мотоцикл басқарудың 6 дерегі анықталып, 51 мотоцикл айып тұрағына қойылды. Жыл басынан облыс көлемінде 30 кәмелетке толмағандармен 45 қылмыс жасалса, оның 2-уі аса ауыр (адам өлтіру) санаттағы қылмыстар болып, 5 жасөспірім қамауға алынды.

Жыл басынан кәмелетке толмағандардың заңды өкілдерінің еріп жүруінсіз түнгі уақытта ойын-сауық мекемелерінде немесе тұрғын жайдан тыс жерде жүрген (442-бап,) 1 мың 674 бала анықталып олардың ата-аналарына әкімшілік шаралар көрілді.

Одан болек, елімізде орын алып жатқан оқиғаларға (Түркістан,Сатпаев қалалары) байланысты, өз бетімен жүрген 10 жасқа дейінгі 164 бала ата-аналарына табысталды. Ағымдағы жылдың басынан отбасы-тұрмыстық қатынастар саласында жасалған қылмыстар +30 пайызға (10-нан 13-ке) артса, бұл қылмыстардың басым бөлігі (7 қылмыс) облыс орталығында орын алған.

Осыған орай, отбасы-тұрмыстық қатынастар саласындағы қылмыстардың алдын алу бағытында облыс көлемінде «Құқық тәртібі» шарасы өткізілді.

Шара барысында 1 мың 763 әкімшілік құқық бұзушылық анықталып, профилактикалық есепте тұрған 809 адам тексерілді.

Отбасы жанжалы мәселелері бойынша тұрғындар полиция департаментінің «102» арнасына немесе 26-28-90 телефон номеріне хабарласуға болатындығын жеткіземін.

Қазіргі уақытта Армения Республикасынан әкелінген автокөліктерді тіркеу науқаны жүргізілуде.

Бүгінгі таңда облыс аумағына 436 көлік әкелініп, оның 198-і уақытша тіркеуге алынды.

Бұл жұмыстар ағымдағы жылдың 1-ші қыркүйегінде аяқталатынын ескеріп, тұрғындардан көліктерін осы мерзімге дейін тіркеуге шақырады.

Бұл көлік құралдарын тіркеу мәселесі бойынша полиция департаментінің 29-77-44, 29-77-80 телефон номерлеріне хабарласуға болады. Қабылданған карантиндік шектеулерге қарамастан әлі де болса ұжымдық, отбасылық көпшілік жиналатын шараларды өткізу тоқтамай тұр. Бүгінгі күні карантин ережелерін бұзудың 289 дерегі анықталды.