Жыл басынан өңірде 2690 қылмыстық құқықбұзушылық тіркелген. Бұл өткен жылмен салыстырғанда 36,4 процентке төмен. Облыс жолдарында орын алған жол-көлік оқиғалары және онда зардап шеккендер саны да азайған.

Ал, жыл басынан бергі 8 айда жол қозғалысын бұзудың 100 мыңнан астам дерегі анықталып, олар бойынша 760 млн теңге айыппұл салынған. Нәтижесінде, облыстық бюджетке 486 млн теңге қаржы өндірілді.

Қабылдау кезінде облыс әкімі Президенттің Қазақстан халқына Жолдауын іске асыру мақсатында «полиция қадамдық қолжетімділікте» қағидаты бойынша жұмысты одан әрі жетілдіру, полиция қызметінің қолжетімділігі мен ашықтығын арттырып, тұрғындармен өзара тиімді байланыс жасау мәселесін жандандыру қажеттігін атап өтті.

Өз кезегінде Бектөре Сұлтан учаскелік полиция инспекторларының мәртебесін заң жүзінде бекіту мәселесі қаралып жатқанын тілге тиек етті.

Департамент бастығы ішкі істер органдарының материалдық-техникалық базасын нығайтуда қолдау көрсетіп келетін облыс басшылығына алғысын білдірді.

Қабылдау барысында облыс әкімі цифрландыру, бейнебақылау камераларын модернизациялау және облыс жолдарында жылдамдық өлшегіш құрылғыларын орнату мәселесін талқылап, тиісті тапсырмалар берді.

Айту керек, қазірдің өзінде қылмыстық істердің жүргізілуінің 60%-і электронды форматқа көшкен. Жыл соңына дейін көрсеткіш тағы да ұлғаймақ.

Кездесу соңында аймақ басшысы Полиция департаментінің алдына нақты міндеттер қойды.