Жұмысшы мамандығы тегін оқытылады
Биыл«Тегін техникалық және кәсіптік білім беру» бағдарламасына 28 жаңа мамандық пен 130 біліктілік қосылды. Сол арқылы роботтандыру, автоматтандыру ісіне қажетті ерекше кәсіп иелері даярланбақ.
Мәселен, өндірістік электроншы мамандығы үшін арнайы оқыту бағдарламасы әзірленген. Жаңа бағдарлама аясында қазақстандықтар алғашқы жұмысшы мамандығын тегін оқиды. Бұл ретте 2 жыл 10 ай бойы білім алатын студенттің 3 бірдей біліктілікті игеруіне мүмкіндігі бар. Білім және ғылым министрі Ерлан Сағадиев: «Биыл бағдарлама аясында білім алушылар саны үш есе көбейіп, 21 мыңға жетті. Оларға шәкіртақы қарастырылған. Бір мезгіл тамақ та ұсынылып, жол ақылары төленеді. Бағдарламаны қаржыландыруға республикалық бюджеттен қосымша 4,3 миллиард теңге бөлінді» деді.
