2018 жылы ұзақтығы шамамен 500 шақырым республикалық маңызы бар автожолдарда ақылы жүйе енгізу жоспарлануда. Бұл туралы Қазақстан Республикасы Үкіметінің және Қазақстан Республикасы Ұлттық банкінің экономикалық саясаттың 2018 жылға арналған негізгі бағыттары жөніндегі мәлімдемесінде айтылған, деп хабарлайды ҚазАқпарат. 

Бүгін Үкімет отырысында мәлімдеме жобасын таныстырған ҚР Ұлттық экономика министрі Тимур Сүлейменовтің айтуынша, Астана мен Алматы аралығындағы Орталық-Оңтүстік және Астана мен Өскемен аралығындағы Орталық-Шығыс дәлізідерінің құрылысы жалғасады. Шығыс және оңтүстік-шығыс өңірінде туризмді және Қытай Халық Республикасынан тауар айналымын ұлғайтуды қамтамасыз ететін Алматы-Өскемен, Қалбатау-Майқапшағай, Үшарал-Достық жолдары жаңғыртылады.

«Жаңа жолдарды сапалы күтіп ұстау және қолайлы және қауіпсіз қозғалысты қамтамасыз ету мақсатында 2018 жылы ұзақтығы шамамен 500 шақырым республикалық маңызы бар автожолдарда ақылы жүйе енгізу жоспарлануда», - деді министр. Оның айтуынша, көліктік ағымдарды тиімді басқару және инфрақұрылымның одан әрі даму қажеттілігін анықтау мақсатында цифрлық технологияларды қолданумен Интеллектуалдық көліктік жүйені кезең-кезеңмен енгізу жөнінде жоспар қабылданатын болады. Айта кетейік, Үкімет отырысында министрлер кабинеті аталған мәлімдемені бірауыздан қолдап, қабылдаған болатын.