Ұшатын көлікке қашан мінеміз?
Таяу арада көліктердің жаңа тарихы жазылатын секілді. Себебі мамандар әуеге ұшақпен емес, көлікпен көтерілудің жолын іздестіруде. Айталық жуырда Түркия елінде Байкардан ұшатын машинаның алғашқы прототипі таныстырылды. Өндірушілердің айтуы бойынша, автокөлік сағатына 100 шақырымға дейін жылдамдықпен ұша алады.Байкар компаниясының Twitter-дегі ресми парақшасындада Cezeri деп аталатын ұшатын автокөлік прототипінің бейнежазбасы жарияланды. Хабарламада «ұшатын көліктің ұлттық деңгейде әзірленгені және болашақ жарыстарға дайын екені» жазылған. Әзірлеушілердің айтуынша, бұл көлік 100 км / сағ жылдамдықпен 2 км биіктікке дейін көтеріле алады. Автокөлік сегіз электр қозғалтқышы мен бұрандасы бар батареялармен жұмыс істейді, сондай-ақ 80 км-ге дейінгі қашықтықта ұша алады.
Мамандар тұрғындардың пилот көмегінсіз, ақылды техника арқылы саяхаттағанын қалайды. Нәтижесінде осындай қайталанбас құрылғы құрастырылып, қыркүйек айындағы сынақтан сәтті өткен.
Автокөлік нарыққа 10-15 жылдан кейін шығуы мүмкін деген болжам бар. Оған дейін тұрғындарға үйреншікті жол, күнделікті көлікпен жүре беруіне тура келеді.
