Мектеп, балабақша арасында кең тараған ауру – вирусты гипатит А
Бұл туралы өңірлік коммуникация қызметінде өткен брифингте Қызылорда облысы бойынша департамент басшысы Ұлбосын Аханаева мәлімдеді. «Былтырмен салыстырғанда вирусты гипатит А жоғары болып тұр. Былтыр 18 жағдай тіркелсе, ағымды жылы 25 жағдай орын алған. Яки 6 жағдайға көбейген. Оның алдын алу шаралары жүргізілуде. Биыл 250 млн. теңгеге вакцина алдық. Қыркүйек айында қосымша вакцина келеді деп күтілуде» – деді Ұлбосын Өмірбайқызы.
Бұл ауру жұқпалы жедел ішек тобына кіреді. А гепатиті немесе Боткин ауруы – вирустық гепатиттің ең кең тараған түрі. Аурудың жасырын кезеңі (залалдағаннан бастап, гепатиттің бірінші белгілері байқалғанға дейін) 7 күннен бастап 50 күнге дейін созылады. А гепатитінің өзіндік таралу жолдары – тұрмыстағы адамдар арасындағы қарым-қатынас және вирустармен залалданған тамақ пен су. Сонымен бірге кір қол арқылы берілетіндіктен А гипатитімен көбінесе балалар ауырады.
Айта кетейік, облыс көлемінде жұқпалы аурулар бойынша аурушаңдық көрсеткіші төмендеді. Лямблиоз 3,7 есеге, жұқпалы жіті ішек аурулар тобы – 43 %-ға, соның ішінде анықталған вирусты және бактериалды ішек аурулары – 43,9 %-ға, биттеу – 3,7%-ға, тамақтан улану жағдайлары – 21,4 %-ға, алғаш анықталған созылмалы вирусты гепатит – 6 %-ға, өкпе туберкулезі, бактериалдық дизентерия, жіті вирусты гепатит С – түрі – 5 %-ға, сарып, анықталмаған вирусты және бактериалды ішек аурулары – 4 жағдайға азайған. Сондай-ақ облыс бойынша кене шағу жағдайымен 708 адам медициналық көмекке жүгінген (2017 жылдың осы кезінде 992 кене шағу) яғни өткен жылмен салыстырғанда 28 %-ға төмендеген. Әлі де кенеден қауіп бар.
Мөлдір САБЫРЖАН
