100 МЫҢ ЗАҢБҰЗУШЫЛЫҚ АНЫҚТАЛДЫ

Жыл басынан бері 700-ден астам лауазымды шенеунік жемқорлығы үшін ұсталған. Бұл ақпаратты қызметінің биылғы бірінші жартыжылдықтағы қорытындысын шығарған Мемлекеттік қызмет істері және сыбайлас жемқорлыққа қарсы іс-қимыл агенттігінің төрағасы Алик Шпекбаев жария етті.

Ол барлық салаларда жоғары лауазымды тұлғалардың қатысуымен жасалған, жүйелі жолға қойылған сыбайлас жемқорлық фактілері әшкереленгенін мәлімдеді. Осы орайда жүйелі коррупцияның 64 дерегінің жолы кесілген. Оның аясында 192 лауазымды тұлға қазір қылмыстық жазаға тартылуда.

– Жалпы алғанда, жыл басталғалы бері Ұлттық бюро 1,5 мыңнан астам қылмыстың бетін ашты. 700-ден астам тұлға қылмыстық жауапкершілікке тартылды. Оның 18-і – республикалық, 55-і – облыстық, 101-і – қалалық және аудандық деңгейлердегі лауазымды тұлғалар. Олардың арасында энергетика вице-министрлері, Сыртқы саясат ведомствосының жауапты хатшысы, Ауыл шаруашылығы министрлігі комитеттерінің төрағасы мен төраға орынбасары, ұлттық компаниялардың топ-менеджерлері, құқық қорғау органдарының басшылары, сондай-ақ әртүрлі деңгейдегі судьялар бар, – деп хабарлады Алик Шпекбаев.

Қабылданған шаралар нәтижесінде мемлекетке келтірілген және әшкере болған шығын көлемі 9,7 миллиард теңгеге дейін жетіп отыр. Бұл былтырғыдан 4 млрд теңгеге артық. 2017 жылдың алғашқы жартысында мемлекет жемқорлар кесірінен 5,9 млрд теңгеге шығындалғаны анықталған. Бұл ретте былтыр ол соманың 4,9 млрд теңгесі ғана өтелсе, биыл бұл көрсеткіш 8,5 млрд теңгені немесе 88 пайызды құрады.
Жемқорлық қылмыстарды тергеу барысында күдіктілердің жалпы құны 4,6 млрд теңге тұратын мүлігі бұғатталған. Бұл да өткен жылғы ұқсас мерзімдегіден 4 есеге көп. 2017 жылғы бірінші жартыжылдықта жемқорлықтың тұтқындалған дүние-мүлкі 1,2 млрд теңге көлемінде болған.

Оқиғалар

02 тамыз 2018 ж. 588 0