СЫР САҢЛАҒЫМЕН ЖҮЗДЕСТІ
Қорқыт ата атындағы Қызылорда мемлекеттік университетінің №9 оқу ғимаратында облыстық ішкі саясат және «Руханиятты қолдау» қоғамдық қорының ұйымдастыруымен «Туған жерге тағзым» әлеуметтік жобасы аясында халықаралық дәрежедегі спорт шебері, пауэрлифтингтен 3 дүркін Азия чемпионы Елдос Ермахановпен кездесу өтті. Оған Қызылорда облысының жас спортшылары, университеттің «Дене шынықтыру» мамандығында оқитын студенттер қатысты.
Елдос Ермаханов – пауэрлифтингтен әлемдік додалардың бірнеше дүркін жеңімпазы. Халықаралық дәрежедегі спорт шебері. Жуырда Дубайда (БАƏ) классикалық жəне экипировкалық жатып сығымдаудан өткен Азия чемпионатында 66 келі салмақта 2 алтын медальді жеңіп алды. Ол экипировкалық түрінен 240 келі, классикалық түрінен 165 келіні көтеріп, 2 дүркін Азия чемпионы атанды. Айта кетейік, Елдос биылғы жылы Əлем чемпионатының 2 мəрте қола жүлделерін иеленген болатын. Кездесу барысында Елдос Ермаханов спорт саласындағы жетістіктерін айтып, алдағы жоспарларымен бөлісті. Сондай-ақ қатысушылар тарапынан қойылған сауалдарға жауап берді.