Облыстық Н.Бекежанов атындағы қазақ музыкалық драма театрында «АШЫҚ ЕСІК» күні жарияланып, Д.Исабековтың «Жүз жылдық махаббат» драмасын қойылды. Заманынан озып туып, соңына өшпес рухани мол мұра қалдырған, көрнекті ақын, Алаш ардақтысы Мағжан Жұмабаев тағдырының ақтаңдақ тұстары аз емес. Халық жауы науқанымен екі рет ұсталып, қырық төрт жыл ғұмырының он жылын қапаста, түрмеде өткізген ақынның қасіретті тағдыры аяулы жары Зылиханың естелігі арқылы спектакльде берілді. Қиын-қыстау уақытқа, небір кедергілерге қарамай ерінің соңынан іздеп сан рет барған, өмір бойы Мағжан рухын ардақтап, өзінің соңғы демі біткенше ұлы ақын жырларының кейінгі ұрпаққа жетуіне бар күш-жігерін салған жұбайы – Зылиха. Олардың ұлы махаббаты – кейінгі сан ұрпаққа өнеге.