Елорданың Бейбiтшiлiк және келiсiм сарайында Мемлекет басшысы Нұрсұлтан Назарбаевтың төрағалық етуiмен Қазақстан халқы Ассамблеясының ХХVI сессиясы басталды. Биылғы сессия «Бес әлеуметтiк бастама - қоғамның әлеуметтiк бiрлiгiнiң тұғыры» тақырыбымен өтедi.

Бүгiн Қазақстан Республикасының президенті, Қазақстан халқы Ассамблеясының төрағасы Нұрсұлтан Назарбаевтың төрағалық етуімен «Бес әлеуметтік бастама - қоғамның әлеуметтік бірлігінің тұғыры» деген күн тәртібімен Қазақстан халқы Ассамблеясының XXVI сессиясы басталды.

ҚХА сессиясының жұмысына 1 500-ден астам адам қатысуда. Олардың қатарында елдің барлық өңірiнен келген Ассамблея ардагерлері, республикалық және өңірлік этномәдени бірлестіктердің төрағалары, Парламент депутаттары, орталық атқарушы органдар, саяси партиялар, діни бірлестіктер, үкіметтік емес ұйымдардың басшылары, ЖОО ректорлары, шет мемлекеттердің дипломатиялық миссияларының, ғылыми, шығармашыл зиялы қауым өкiлдерi мен бұқаралық ақпарат құралдары бар.