SMS-хабарлама арқылы ең жиі сұраныстағы 4 қызметті алуға мүмкіндік беретін @EgovKzKenesBot Telegram-боты жұмысын бастады. Бұл туралы Орталық коммуникациялар қызметінде өткен баспасөз мәслихатында «Ұлттық ақпараттық технологиялар» АҚ басқарма төрағасы Әсет Тұрысов хабарлады.

«SMS-хабарлама арқылы ең жиі сұраныстағы 4 қызметті алуға мүмкіндік беретін @EgovKzKenesBot Telegram-боты жұмысын бастап кетті. 4 қызметтің ішінде - мекенжай анықтамасы, басқа заңды тұлғаларға жеке тұлғалардың қатысы туралы анықтама, сотталмағандығы туралы анықтама, жылжымайтын мүлкінің бар-жоғы туралы анықтама кіреді. Оны қолдану үшін мобильді азаматтар базасында міндетті түрде тіркеуде болу керек. Яғни, өз телефоныңыздың нөмірі egov.kz порталының профиліне бекітілуі тиіс. Таяуда қызметтердің түрін көбейту жоспарланып отыр. Сонымен бірге, алынған анықтаманы телефонға сақтап қоюға немесе e-mail арқылы жолдауға болады», - деді спикер. Оның айтуынша, жақында компания egov.kz порталының редизайнын жасауды қарастырып отыр. «Қазіргі дизайн 2012 жылы жасалған. Бір сөзбен, қазіргі заманның талаптарына сәйкес келе бермейді. Қолданушымен кері байланысты ұстану үшін порталдың beta-нұсқасы әзірленіп қойған. Қолданушылар онда өздерінің пікірлерін қалдыра алады», - дейді Әсет Тұрысов. Ол сонымен бірге, ҚР Ұлттық куәландырушы орталығының (pki.gov.kz) да сайты қайтадан қаралатындығын айтты.