Алдағы сенбі, яғни, 18 тамыз – шекарашылар күні. Кеңес кезінде 29-мамыр күні тойланатын мереке 2012 жылдан бастап осы күнге ауысқан. Отанды қорғап, күні-түні көз ілмейтін шекарашы мехнатын кез келген адам түсінбес. Жүректілікпен қатар, жылдамдықты қажет ететін бұл қызметті жігіттің жігіті атқаратыны анық. Темірдей тәртіпке шыдайтындарға ғана мұнда орын бар. Мұнда «істей алмаймын» деген сөз жоқ. Бұйрық талқыланбайды, орындалады. Тіпті, алыстағы ата-ана мен дос-бауырды сағынуға да уақыт жоқ. Қару-жарақты пайдаланудан бөлек, небір ұрыс тәсілдерін игеру, техникалық құралдар мен көлікті жүргізу... Бірыңғай бесаспап болу қажет. Тіпті, ас пісіруде де. Сондай ел қорғаушы азаматтарды Сыр бойынан табуға болады. Біздің Қызылорда қаласындағы №2019 әскери бөлімі тікелей шекара қызметімен байланысты. Құрылу тарихына көз жүгіртсек, жиырма жылға таяп қалған бұл бөлімнің еліміз үшін маңызы зор. Ұлттық қауіпсіздік комитеті төрағасының 1999 жылғы 15 қыркүйектегі бұйрығына сәйкес ҚР оңтүстік бағыттағы мемлекеттік шекараны нығайту мақсатында және ҚР ҰҚК шекара қызметінің даму бағдарламасына сай тұрақты жұмыс жасап келеді. Бұл бөлім сол жылдан бастап Өзбекстанмен арадағы шекараны нығайту, елдің саяси және экономикалық мүдделерін қорғау, заңсыз көшіп-қонудың алдын алу, қазақ еліне қару-жарақ, оқ-дәрі, есірткі және радиоактивті заттарды заңсыз кіргізбеу міндендеттерін мінсіз орындап келеді. Олар облыстағы мемлекеттік органдар мен жергілікті тұрғындардың көмегін пайдалана отырып, мемлекеттік шекара шебін күзетуде.

Шекараны күзету кезінде жергілікті тұрғындардың да көп көмегі зор. Шекара аймағында тұратын халық шекара бұзушыларды ұстауда
ерекше қырағылық танытып, әскерилерге ұдайы көмек көрсетеді. №2019 әскери бөлімінің қорғау нысаны Арал ауданының әкімшілік аймағынан бастау алып, Жаңақорғанға дейінгі аралықты қамтиды. Құрылған жылдан бастап біздің шымыр шекарашылар елге заңсыз өтпек болған келімсектерді ұстап, контрабандалық тауар тасушының жолын кескен. Ел қазынасының ортаймауына орасан үлес қосқан.

Егемен ел тыныштығының кепілі – шекара тыныштығы. Шекара қызметін қамтамасыз ету бойынша түрлі шаралар өтеді. Бабалар ерлігін келер ұрпаққа дәріптеп, ерлігін жалғастыру Отан қорғаушы әрбір азаматтың борышы десек, шекара заставаларына халық батырларының есімі берілді. Соның бірі, 2017 жылы ашылған Сыр бойындағы «Қызылқұм» заставасына Жанқожа Нұрмұхамедұлының есімі берілгені белгілі. Батыр баба ерлігін дәріптеу шекарашы жігіттерімізді рухтандырады.

Айтпақшы, көлемі бойынша әлемде тоғызыншы орын алатын шекарасының ұзындығы, табиғи жағдайы сан түрлі. Ми қайнатар ыстығы, алты айға созылар ақ бораны, долы дауылы мен үскірік желі – бұның бәрі біздің шекарашылар үшін өз міндеттерін абыроймен орындауға кедергі емес.  Елбасының халықаралық аренадағы қол жеткізген ең биік жетістігінің бірі – көрші мемлекеттермен арадағы шекараны нақтылап, бекітіп, алдағы уақытта еш алаңдамауға сіңірген еңбегі баршаға аян. Бүгінде Қытай Халық Республикасы, ТМД елдерімен шекара шешімі толығымен аяқталған, жасақтар мен бекеттер толық орналастырылған. Нақты сандарға тоқталсақ. Бүгінгі күні ҰҚК қарасты Шекара қызметі жалпы ұзындығы 15132 шақырым  шекараны күзетсе, оның 2355 шақырымы Өзбекстанмен, 426 шақырымы Түркіменстанмен шектеседі, ал Ресеймен байланысты 7548 шақырым әлемдегі құрлықпен өтетін ең ұзын шекаралық сызық ретінде Гиннестің рекордтар кітабына енген. Теңіздегі шекара – 1779 шақырым, қарт Каспийдің үстімен өтеді. Кедендік одақпен біздің елден өтетін сыртқы шекараның ұзындығы – 7805 шақырым.

«Шекара мәселесінде ұсақ-түйек деген мүлдем болмайды. Біз үшін ата-бабамыздан қалған атамекеннің әр пұшпағы аса қымбат. Сондықтан бұл істе біз аса ыждағаттылық пен қырағылық таныттық» деп Елбасы атап өткендей, ел шебі саналатын мемлекеттік шекараның  мәні мен маңызы қанша ғасыр өтсе де төмендемейді.

Түйін. Күннің батуы шекарада біздегідей жұмыс күнінің бітуін білдірмейді. Керісінше, мұндағылар шекараны қырағы көзбен қадағалайды. Кез келген уақытта дабыл қағылуы мүмкін. Әсіресе, контрабандалық жолмен оңай олжаға батқысы келгендер түн жамыла жортатыны бар. Өйткені, жау – жар астында. Шекарадан қауіп көп. Сондықтан бес қарудың бабында болуы шекарашылар үшін маңызды. Жоғарыда айтып өткендей, елді қорғау қызметі мемлекеттің қауіпсіздік саласында қастерлі қызмет. Сондықтан шекара қорғау мәртебесі әрбір жігітке бұйыра бермесе керек. Бұл міндетті атқаруға көзінің оты бөлек ерекше азаматтардың  тартылуы сондықтан.