Өткен жылдың қыркүйек айында «Ерекше» дизайнерлік-сублимациялық оқыту орталығы «ЖасПроджект» жобасы аясында өз жұмысын бастаған болатын. Орталық сублимация жолымен киімдерде, ыдыстарда қалаған бейне, жазбаларды алуға мүмкіндік беретін арнайы құрылғылармен жабдықталған. Осы кәсіп түрімен жетік танысып, үйреніп, алдағы уақытта өз істерін ашуға ниеті бар жастар үшін орталықта оқыту бағдарламасы әзірленген. Арнайы дайындалған оқыту кестесі бойынша әр айда жастарға бірінші кезеңде тренингтер жүргізілді, екінші кезең сублимациялық бейне алу үшін арнайы бағдарламада жұмыс жасауды үйрету кезеңі болып табылса, ал үшінші кезең алынған теориялық білімді практикада жүзеге асырып, арнаулы киімдерде (футболкалар, бейсболкалар) және ыдыстарда (кружкалар, тарелкалар) өз қалаған бейнелерін алумен аяқталды.

2018 жылдың желтоқсан айының 24-жұлдызында «Ерекше» дизайнерлік-эксклюзивті модельдегі өнім жасауды үйрету орталығында айтулы кеш өтті. Кеш барысында орталықтың белсенді жастарымен арнайы практикалық сабақ өтілді. Практикалық сабақтың кіріспесі жалпы «кәсіп» ұғымына түсініктеме берумен басталып, кәсіпті дамыту жолдары, ерекше сұранысқа ие болу тәсілдері, жаңашылдыққа бет бұру сынды ауқымды тақырыптарды қамтыды.

Кештің екінші бөлімінде арнайы ойын ұйымдастырылып, жастарға ұлы тұлғалар мен олардың қанатты сөздері жазылған парақшалар үлестірілді. Сабақты қорытындылай келе, студенттер сублимацияға арналған құрылғылардың көмегімен өздеріне тиесілі парақшалардағы бейне мен жазуды ақ футболкаларда басып шығарып, теориялық білімдерін практикада жүзеге асырды. Кеш соңында алынған өнімдер жастарға алғашқы Жаңа жылдық сыйлық ретінде таратылды.

Түрлі кәсіп түрлерін үйреніп, меңгеруге мүмкіндік берген «ЖасПроджект» жобасына жастардың алғысы шексіз!