Қызылорда қаласындағы жалпы білім беретін мектеп директорларының тәрбие ісі жөніндегі орынбасарлары Назарбаев Зияткерлік мектебінде семинар-тренигтен өтті.

Онда облыс орталығындағы 60-қа жуық тәрбие мамандары бас қосты. Зияткерлік мектеп директорының тәрбие ісі жөніндегі орынбасары Талғат Жүсіпбек бала тәрбиесінде мектеп жобаларының маңыздылығын атап өтіп, қатысушыларды семинар бағдарламасымен таныстырды. Педагог-ұйымдастырушы-куратор Гүлжайна Сайфуллақызы оқушылардың ел тарихын танып білуге негізделген «Туған елге тағзым» өлкетану-зерттеу экспедициясының мақсат-міндеттерін түсіндіріп, оның жүзеге асырылуын тәжірибе арқылы көрсетті. Семинар бағдарламасына сәйкес қатысушылар үш топқа бірігу арқылы Назарбаев Зияткерлік мектептерінде тәрбие жұмысының ұйымдастырылу барысымен танысты. Зияткерлік мектептің педагог-ұйымдастырушы-кураторлары мектепте жүргізілетін «Қоғамға қызмет», «100 ән, 100 күй», «TEDX NIS клубы» тәрбиелік маңызы бар жобалар мен жазғы әлеуметтік тәжірибелер туралы баяндады. Сонымен қатар қатысушылар педагог-психологтардың «Бала әл-ауқатын ұйымдастыру іс-әрекетінің ерекшелігі» тақырыбында ағартушылық семинар-тренингтен өтті.

Шара соңында педагогтар зияткерлік мектепте жұмыс істейтін 40-тан астам қосымша білім беру үйірмесіне қатысушы балалардың ағаштан, қыштан жасаған қолөнер бұйымдарының көрмесін тамашалады