Қала тазалығының басты орында екені айтпасақ та белгілі. Бұрын әр-жерде шашылып жатқан қоқысты жиі кездестіретінбіз. Бұл мәселеде "Қызылорда тазалығы" мекемесінің қызметкері өз ісіне мұқият. Оның үстіне өздігінше жоба ойлап, көше тазалығына үлес қосып жүрген жастар да табылды. Ол "Green Plastic" жобасының үйлестірушісі – Бақытжан Ыбрашев.

  "Green Plastic" – жобаның атауы. Мақсатымыз – айналамызды пластикалық қоқыстардан тазарту. Жобаны студент кезден ойластырғанмын. Қоқыстан қандай да бір зат шығарып, қаланы тазартуды армандайтынмын. Сондай-ақ бұл істі бизнеске айналдыруды жоспарлап жүрдім. Бүгінгі таңда жоба арқылы идеяны жүзеге асырдым. Нәтижесі көңіл көншітерлік. Қоқыстан тазару бұл – бүкіләлемдік мәселе. Оның ішінде пластикалық түрі. Дәл осындай жобамен алматылық әріптестерім айналысады. Сұрастырып мән-жайға қанық болдық. Бірлесе жұмысты іске асырдық. Сондай-ақ олардың бағыт-бағдары бойынша жұмыс істедік. Жақында пластикалық кафельдерді көрмеге қойдық. Осылайша пластикалық қоқыстан қандай да бір зат алып шығуға болатынын дәлелдедік.

Шиелі аудандық әкімімен келісім жүргізілуде. Келісімшартта көзделгені – ауданда пластикалық қоқыс тастайтын жәшік санын көбейту. Бұл бізге ыңғайлы болмақ. Сондай-ақ қала тазалығына да септігін тигізеді.

Үлкен көлемдегі пластикалық қоқыстарды майдалау үлкен қиындық тудырып тұр. Егер қандай да бір қаражат бөлінсе, көптен ойлап жүрген жоспарды іске асырамыз және халықпен бөлісеміз.

«Жастар жылы» деп еншілеп, үкі таққаннан кейін жыл жастар қауымы үшін жақсылыққа толы болады деп ойлаймын. Соның ішінде жастардың баспаналы болуына мүмкіндік көбейсе, тұрмыс сапасы артуының нақты көрінісі болар еді. Сондай-ақ тасада қалып қойып жатқан талантты ауыл жастарын, өнерпаздарды, өнертапқыштарды тауып, оларға қолдау көрсету, серпін беру, жеңілдетілген шағын несиелер алуына жағдай жасау – кезек күттірмейтін мәселелер. Жалпы жастар жылынан үміт көп. Бастысы, жастар өздеріне берілген мүмкіндікті жіберіп алмаса деймін.