Қазақстан ең ірі халықаралық туристік көрме ITB Berlin-ге қатысып жатыр. Биыл әлемнің ең ірі туристік шараларының бірінде 181 елден келген 10 мыңнан аса қатысушы, бүкіл әлемнен келген туристік бизнестің 100 мыңнан аса кәсіби маманы, сонымен қатар ондаған мың келушілер болады.

Наурыздың алтыснда ҚР Мәдениет және спорт министрі Арыстанбек Мұхамедиұлының және Қазақстанның Германия Федеративтік Республикасындағы Төтенше және Өкілетті Елшісі Болат Нүсіповтің қатысуымен көрмедегі қазақстандық стендтің ашылу салтанаты өтті. Ресми ашылудан кейін стендте «Kazakh Tourism» ҰК» АҚ және Messe Berlin арасында берлиндік көрменің аналогы ITB Eurasia көрмесін келесі жылы Астанада өткізу жөніндегі келісімге қол қойылды.  ҚР Мәдениет және спорт министрлігінің Туризм индустриясы комитетінің және Алматы қаласының Туризм басқармасының қатысуымен ұйымдастырылған қазақстандық стендтің негізгі концепциясы – еліміздің мәдениеті мен этника болды.  Берлин қаласындағы көрмеде «Kazakh Tourism» ҰК» АҚ ұлттық тағамдарға, көшпелі өркениет мұрасына, Қазақстанның мәдени және табиғи орындарына ерекше мән беріп, этникалық және мәдени туризм тақырыбын ұсынды. Тағы бір айта кететін жайт, стендте өтетін шеберлік сыныптарында қонақтарымыз құрт және жент жасауды, сазсырнай музыкалық аспабын жасауды үйрене алады. Сондай-ақ көрмеде бірегей «бармен-шоу» өтпек: қонақтарға қымыздан жасалған түрлі коктейльдерден дәм татуға мүмкіндік беріледі. Осылайша, 5 күн ішінде қазақстандық стендте келуші қонақтар еліміздің мәдениетімен және салт-дәстүрлерімен танысады. Бұған қоса, көрмеге келушілер Бозжыра шатқалы бейнеленген фотозонаның алдында суретке түсіп, виртуалды шындық көзілдірігін тағып көріп, дәстүрлі дастархан түрінде жасалған арнайы b2b аумағында қазақстандық туристік компаниялармен келіссөздер жүргізе алады. Көрмедегі қазақстандық делегация құрамына 30-дан аса адам кіреді. Олардың ішінде елге турист әкелуші туристік компаниялардың, қонақ үйлер мен өңірлік туризм басқармаларының өкілдері бар.

Euromonitor мәліметтері бойынша, Германияның шығу туризмі көрсеткіштерінің тұрақты түрде өсуі байқалуда. Осылайша, 2017 жылы Германиядан басқа елдерге шыққан адамдар саны 102,9 миллионға жетіп, 2016 жылмен салыстырғанда 4% өсім көрсетті. Германиялық туристер 2017 жылы шет елде 78,2 млрд АҚШ долларын жұмсап, бұл көрсеткіш 2016 жылмен салыстырғанда 5,9%-ға артқан. Статистикалық алдын ала деректер бойынша, 2018 жылы Германиядан Қазақстанға келген адамдар саны 100 мыңға жуық. Қазақстан ITB көрмесіне жыл сайын қатысып келеді. ITB халықаралық туристік көрмесі (Германия, Берлин) 1966 жылдан бері жыл сайын өткізіледі, және жаһандық туристік ұсыныстар үшін негізгі бизнес-платформа болып табылады. Бұл – ең ірі әрі келушілер саны ең жоғары туристік көрме. Көрменің 26 павильонында туризмнің қазіргі кездегі барлық бағыттары, яғни тарихи-мәдени және белсенді туризмнен бастап круиздер мен СПА-демалыстарға дейін, барлығы көрсетілетін болады.