Заман қаншалықты дамығанымен, адам баласын тура жолдан тайдырып, адастыратын нашақорлық дерті жойылар емес. Сондықтан күн өткен сайын бұл індетпен күрес жүйелі түрде жүргізіліп келеді. Қызылорда облысы Полиция департаментінің Есірткі қылмысына қарсы іс-қимыл басқармасы бұл бағытта арнайы кешенді жоспар бойынша жүйелі түрде жұмыс жасауда. Мәселен жыл сайын "26 маусым -Халықаралық нашақорлыққа қарсы күрес күнін" әсіресе жас буын оқушылар арасында белсенді өткізуге тырысады. Дәстүр биыл да өз жалғасын тапты. Оқушылардың өздерін қатыстыра отырып, көпшілік оқырманға нашақорлықтың адам өмірін тас-талқан етуге де қауқары бар екенін түсіндірді.

Айта кету керек, мұндай шаралар облыстың бірқатар аудандарында өтті. Онда тек көрмелерден бөлек, талантты оқушылардың туындылары да қойылды. Яғни осы арқылы жас буынның санасына уақытты тиімді пайдалану, ғылымға үлес қосу секілді жақсы дүниелерді жеткізгісі келді. Әсіресе, Жаңақорған ауданына қарасты #256 мектептің оқушысы құрастырған роботы ерекше қызығушылық тудырды. Сондай-ақ Қармақшы, Шиелі, Сырдария аудандарындағы мектептерде "Нашақорлыққа жол жоқ" тақырыбында үлкен іс-шаралар өткізіліп, оқушылар өз өнерлерін ортаға салды. Тіпті, ағылшын тілінде кеш жүргізіп, білім деңгейлерін көрсеткен оқушылар да болды.

Осындай өрендеріміз барда нашақорлық дертін жоятынымыз анық.