Қала күні мерекесіне арналған «Береке мен бақ қонған – Қызылорда!» атты апталық шаралар жалғасуда. Ертең «Көше Fest» сайысы өтеді. Қалалық мәдениет және тілдерді дамыту бөлімінің ұйымдастыған сайыс қалаға жақын орналасқан мөлтек ауданындағы көшелер арасында болмақ.

    Көше тұрғындарының ауызбіршілігін арттыру, өскелең ұрпаққа ақсақалдарды қадірлеуге шақыру, жастардың бойында иба-ізет, намыс, ар-ождан, қадір-қасиет сынды биік адамгершілік қасиеттерді қалыптастыру және де қаланың бір бөлшегі саналатын көшенің тазалығы, қаланың тазалығын сақтауға шақыру мақсатында өткен бұл шараның болашақ жас ұрпақтарға зор үлгі-өнеге болары анық. Көше сайысына қала аумағынан Әміре Қашаубаев көшеcі, Тасбөгет кентінен Мұстафа Шоқай атындағы, Қызылжарма ауылдық округінен Әлібай Әбенов көшесі, Абай ауылдық округінен Абай көшесі, Қараөзек ауылдық округінен Абылайхан көшесі, Ақсуат ауылдық округінен Абай көшесі, Талсуат ауылдық округінен Космонавт көшелері, яғни, барлығы 7 көше қатысады.

   
Сайысқа ардагерлер кеңесінің төрағасы Әбішев Сайлаубай Әбішұлы қазылар алқасының төрағалық етсе, журналист ақын, «Қазақстан Жазушылар Одағының» Қызылорда облыстық филиалының төрайымы Есімсейітова Қаршыға Құрмашқызы, Кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңес төрағаcы Нұрхожаев Болат Жолтайұлы, ақын, Мәдениет Үйі жанынан құрылған «Қауырсын» жас ақындар үйірмесінің жетекшісі Байдаулетов Мамыр Бәйментайұлы, «Қажымұқан Мұңайтпасов атындағы спорт клубы» мемлекеттік коммуналдық мекеменің директоры Бозова Жамал Қыпшақбайқызы қазылық жасайды. Сайыстың І кезеңі бойынша әр қатысушы көшенің тазалығы бақыланды. ІІ кезең – Өнер кезеңі бойынша көшенің тұрғындары қойылым көрсету арқылы батагөй ақсақалдарын, ертегі айтатын үлгілі әжелерін, өнегелі, өнерлі қыз-келіншектерін, сегіз қырлы, бір сырлы жігіттерінің өнерлерін көрсетсе, ІІІ кезең - Спорттық сайыстар, яғни, арқан тартыс, гір көтеру, қол күрестен жарысады.