Жақында ғана Мемлекет басшысы Қасым-Жомарт Тоқаев "Абай және ХХІ ғасырдағы Қазақстан" деген мақаласында қазақтың басы ақынының 175 жылдығын жоғары деңгейде атап өту керектігін айтқан еді. "Бұл той бұрынғыдан өзгерек" болуы керек дегенді де тілге тиек етті. Өйткені әр жылдары аталып өтетін мерейтойлар көңіл көтеріп, флешмоб билеумен өтіп жүргені рас. Сондықтан бұл жолы қазақ философының мерейтойын эстафетамен бастап, оның өнегелі өмірін, ұрпаққа қалдырған мол мұрасын, оның том-том еңбегін халық арасында кең көлемде насихаттайтын рухани-әдеби шаралармен ұласса игі болар еді. Есесіне бұл ғасырға бергісіз тұлғаның ізін басып, дүниенің кірпішін қалап жүрген өскелең ұрпақ үшін үлкен сый болары анық. Бұған жалғыз билік басындағылар емес, жалпы, ұлт болып атсалысуымыз қажет деп ойлаймын.