Халық әндері насихатталды

Қызылорда қалалық химия-биологиялық бағыттағы Назарбаев Зияткерлік мектебі Халыққа қызмет көрсету орталығында Тұңғыш Президент күніне арналған музыкалық флешмоб ұйымдастырды.

Шара барысында мектептің халық аспаптар оркестрінің орындауында Құрманғазының «Балбырауын», «Сарыарқа», «Адай» және Нұрғиса Тілендиевтің «Ата толғауы» мен «Әлқисса» секілді күйлері шырқалды. Сонымен қатар мектептің өнерлі оқушылары Елбасымыздың сүйіп тыңдайтын әндерімен және Ұлт Көшбасшысына арналған әндермен шеру жасап, халыққа қызмет көрсету орталығына келген облыс тұрғындарына мерекелік көңіл-күй сыйлады. 

Аталған флешмоб еліміздің барлық өңірінде «Назарбаев Зияткерлік мектептері» желісіне кіретін мектептердің қатысуымен бір уақытта өткізілді. Шараның мақсаты – қазақстандық патриотизмді қалыптастыру, ұлттық өнеріміздің өркендеуіне үлес қосатын ұлттық құндылықтарды өзара ұштастыра алатын ұлтжанды тұлғаны тәрбиелеу.