Аймақ өнерпаздары концерт берді
ҚР Тұңғыш Президенті Н.Ә.Назарбаевтың «Болашаққа бағдар: Рухани жаңғыру», «Ұлы даланың жеті қыры» атты бағдарламалық мақалалары аясында облыстық филармонияның Тұрмағамбет атындағы халық аспаптар мен камералық оркестрі және «Сыр самалы» вокалды аспапты ансамблінің «Мәңгілік сарын» атты маусымдық жабылу концерті өтті.Н.Бекежанов атындағы қазақ музыкалық драма театрында өткен кеште түрлі тақырыпта әндер шырқалып, ҚР Мемлекеттік академиялық симфониялық оркестрінің дирижері, Қазақстанның еңбек сіңірген қайраткері Мүсілім Әмзенің дирижерлық етуімен халық әндері мен елге белгілі композиторлардың шығармалары орындалды. Бұдан бөлек, Тұрмағамбет атындағы халық аспаптар оркестрі мен «Сыр самалы» вокалды ансамблі кеш көркін қыздыра түсті. Сонымен қатар, «Астана Опера» опера және балет театрының солисті, Қазақстанның еңбек сіңірген қайраткері Бибігүл Жанұзақ, «Құрмет» орденінің иегері Самал Байсейітова, халықаралық және республикалық байқаулардың лауреаты Айдос Иманжаппаров, Назерке Нұраддинова, Айдана Наукеева, Ақнұр Аманбаева, Бағдат Құдайбергенов, Ақберген Тоғанасова және т.б өнер иелері жиылған көпшілікке ән мен биден шашу шашты.
Аймақ өнерпаздарының қала халқына арналған мерекелік концертіне көпшілік те риза. Ұйымдастырушылар мен өнер ұжымына ризашылықтарын білдіріп, естелік суретке түсті.
«АЖ» ақпарат.
