Еріктілерге алғашқы медициналық көмек көрсетудің негізгі қағидаларын түсіндіру, медицинаның алғы шарттарын ұғындыру, ептілікке, жылдамдыққа, мейірімділікке, ұжымшылдыққа баулу мақсатында ағымдағы жылдың қараша айының 4-і күні «Болашақ» жоғары медицина колледжі және «Қазақстан еріктілерінің лигасы» жастар ұйымы қала еріктілері арасында «DENSAULYQ LIFE» алғашқы медициналық көмек көрсету сайысын өткізді.

Сайыс 4 кезеңнен тұрды. Бірінші кезең «Медицинаның алғы шарттары» деп аталды. Бұл сайыста әр қатысушыға қол жуу, медициналық қолғап киіп-шешу, маска киіп-шешу ережесін көрсету тапсырмасы беріліп, команда басшысына COVID-19 туралы сұрақ қойылды. Сайыстың «Сенің әреке­тің» атты екінші кезеңінде командаға ситуациялық сұрақтар беріліп, қаты­сушылар үстел үстіне қойылған медициналық құралдарды пайдалана оты­рып, мысалмен жауап берді. «Кім жылдам?» деп аталатын үшінші кезеңде жасырылған медициналық белгілері бар стикерлерді жылдам жинау шарты қойылды. Көп стикер жинаған команда көп ұпайға да ие болды. «Өмір – қымбат» деп аталған соңғы кезеңде қатысушылар симмуляциялық орталықта өкпе-жүрек реанимациясын көрсетті.

«Болашақ» жоғары медицина колледжінің психологы А.О.Көпжасар еріктілердің ұйымдастырушылық қабілетін, дарынын, мінез қырын анықтауға арналған психологиялық тест жүргізді.

Сайыс қорытындысы бойынша бас жүлдені «Медишл», І орынды «Зия­лылар», ІІ орынды «Антисептик», ІІІ орынды «Антивирус» командалары алды. Сондай-ақ, сайыс барысында өзін жан-жақты көрсете білген жас­тарға «Жылдам ерікті», «Ақылды ерікті», «Білімді ерікті», «Епті ерік­ті» номинациялары берілді.

Өзін құрметтейтін әрбір адам баласы өмір сүруге қажет қаржылық, діни, медициналық, құқықтық сауаттылығын арттырып отыру керек. Меди­цинаның алғы шарттар мен алғашқы медициналық көмек көрсетудің негіздерін үйреткен бүгінгі сайыстан жастардың алары көп болды деп ойлаймын.