Бүгінгінің қыздары...
Бүгін түскі үзілісте жұмыстан шығып, аялдамада тұрғанмын. Шығармашылық үйінің бұрылысындағы қыз бен жігіттің әрекеті ерсі көрінді. Қыз жүргізуші жақта жігітпен дидарласып тұр екен. Жолдың қақ ортасындағы көліктен автобус айналып өтуде. Оны қойыңызшы... Мәселеге төтесінен көшсек, бозбала мен бойжеткен тапа-тал түсте, жұрттан қымсынбай, құшақтасып, аймаласып қояр емес. Бірін-бірі енді көрген қош ғашық іспеттес. Жігіт бойжеткенді жіберер емес. Мен көрдім, сонымен қоса шығармашылық үйінің терезесінен кез келген қызметкердің көргені жасырын емес. Бойжеткен «Сыр медиа» ЖШС-дағы облыстық басылымға тәжірибеден өтуге келген. Ата-анасы қызым болашақта білікті маман болады деп үміттеніп жүр-ау. Үміт артқандағысы сен болсаң...Қыздың тағдыры бізді алаңдатаны жасырын емес. Күн өте келе, олар қандай болмақ? Құрбыммен «Шымбай» мөлтек ауданына бір кафеге барғанмын. О, тоба, шоудың жеті атасы сонда екен. Биді көрсең айдаладан шошисың. Бір-біріне жабысқанын көргенде көз ұялады. Бірде туған күн тойлауға түнгі клубқа бардық. Құрбым өтінген соң көңілін қалдырмадым, оның үстіне арадағы сыйластық бар... Қыздардың жарыса кальян шеккенін сонда көрдім. Бұрын сыра ішіп жарысатын, ол жолда қалыпты. Ысқырықтың даусы құлақ тұндырады. Айта берсең көп енді.
Қазіргі қыздар да еркіндеу. Жүрісі де еркін, тұрысы да еркін. Ойлауы да еркін. Сөйлеуі де еркін, тілі де еркін, діні де еркін. Қыздар хиджаб, жігіттер пиджак киеді. Бойжеткендердің арасында иманды һәм ибалылары да жеткілікті. Сонымен қатар қырық үйден тыйым түгілі, тоқсан үйдің тосқауылына да пысқыра қоймайтындары да жетерлік.
Мөлдір САБЫРЖАН
