Күзгі науқанда УЕФА өткен жылы кәрі құрлықта өнер көрсеткен футболшылардың үздігін анықтайды. Бақылаушы топтың ресми сайтында 2019/20 жылғы футбол маусымның ең үздік ойыншысы атағына үміткер үш есімді атады. Олар – Кевин де Брюйне, Роберт Левандовски және Мануэль Нойер.

Жоғарыда есімдері аталған ойыншылардың барлығы да әлемдік футбол тарихында өзіндік із қалдырғанына ешкімнің дауы жоқ. Мәселен, 29 жастағы Бельгия ұлттық құраманың жартылай қорғаушысы Кевин де Брюйне 2015 жылдан бері Англия Премьер-лигасында «Манчестер Ситидің» сапында өнер көрсетуде. Өткен маусымда ол 35 рет жасыл алаңға шығып, 15 голдың авторы атанды. 21 рет өз әріптестеріне нәтижелі пас берді.

32 жастағы польшалық Роберт Левандовски мен 34 жастағы неміс Мануэль Нойер ұзақ жылдар бойы «Баварияның» намысын қорғауда. Алғашқысы – шабуылшы, екіншісі – қақпашы. Левандовский былтырғы маусымдағы 31 ойында 34 рет қарсыластар қақпасын дәл көздеді. Ал Нойер талай маңызды матчтарда небір жойқын соққыларды кері қайтарып, өзінің әлемдегі ең үздік қақпашының бірі әрі бірегейі екенін сан мәрте дәлелдеді.

Былтыр бұл атақты Нидерланд ұлттық құрамасы мен Англияның «Ливерпуль» клубының тасқамал қорғаушысы Вирджил ван Дейк иеленген. Ал биылғы жылдың үздігі бүгін анықталады.