Спорттың адам өмірінде алатын орны зор екенін бәріміз жақсы білеміз. Ата-бабаларымыз «тәні саудың – жаны сау» деп бекер айтпаған. Бүгінде бұқаралық спорт және саламатты өмір салтын ұстану деген қағидалардың ел дамуының басты кілті болуы – соның айғағы. Осы орайда Birgemiz: Sabaqtastyq жалпыұлттық жобасы аясында кәмелетке толмағандарды бейімдеу орталығының тәрбиеленушілері ерікті тәлімгерлермен бірлесіп «Спорт – біздің серігіміз» атты сайыс өткізді.

Сайыстың мақсаты – жасөспірімдерді саламатты өмір сүруге шақыру, денсаулыққа зиянды заттардан аулақ болуға үндеу, спортпен айналысуға қызықтыру. Сайысқа «Қыран», «Барыс», «Тұлпар» деген үш топ қатысты. Қатысушылар бірнеше кезең бойынша сынға түсті. Нәтижесінде, ең жоғары ұпаймен «Қыран» тобы І орынды иеленді.

«Қоғамда саламатты өмір салтын қалыптастыруда жсаөспірімдерді спортқа баулудың маңызы зор.Тіпті олар спортпен белсенді айналыспаған күннің өзінде адам өмірінде анау-мынау ауру-сырқауға қарсы тұру үшін ақы сұрамайтын қарапайым жаттығулар мен белсенді қимыл-қозғалыстың қаншалықты маңызды екенін түсіну керек. Сол үшін мұндай сайыстар ұйымдастыру өз нәтижесін береді деп сенемін», – дейді қырандықтардың капитаны Қазбек Боранбаев.